BJELLORUSI- Ekspertët e Kombeve të Bashkuara kanë bërë thirrje për një hetim të menjëhershëm mbi vdekjet e disidentëve në burgjet bjelloruse. Ekspertët u shprehën se gjatë katër viteve të fundit, shumë njerëz – që mbrojtësit e të drejtave të njeriut thonë se ishin të burgosur politikë- kanë vdekur në paraburgim ose menjëherë pas lirimit të tyre.
Disa nga të ndaluarit morën pjesë në protestat që pasuan zgjedhjet e kontestuara presidenciale të vitit 2020, të cilat Aleksandër Lukashenko i fitoi zyrtarisht me 80% të votave. Dhjetëra mijëra njerëz demonstruan për javë të tëra, duke denoncuar mashtrimet, duke marrë pjesë në një lëvizje historike sfiduese që u shtyp ashpër nga autoritetet.
Ekspertët, duke vepruar sipas një mandati nga Këshilli i OKB-së për të Drejtat e Njeriut, por duke mos folur në emër të organizatës, konsideruan se ka arsye për të besuar se këta njerëz humbën jetën sepse ushtruan të drejtat e tyre civile dhe politike.
“Është jashtëzakonisht e rëndësishme që të kryhen hetime për rastet e dyshuara të keqtrajtimit dhe neglizhencës që çuan në këto vdekje, si dhe vdekjet e individëve të tjerë të përshkruar nga mbrojtësit e të drejtave të njeriut si të burgosur politikë”, këmbëngulën ata.
Duke paraqitur raportin e tij vjetor në Këshillin e të Drejtave të Njeriut të OKB-së në fund të qershorit, eksperti, Nils Muiznieks tha se situata e të drejtave të njeriut në Bjellorusi ishte “katastrofike” dhe kishte vazhduar të përkeqësohej.
Sipas organizatës bjelloruse të të drejtave të njeriut Viasna, numri i të burgosurve politikë në burgjet e vendit tejkalon 1,000.
“Nëse këto shifra do të vërtetoheshin të sakta, Bjellorusia ndoshta do të ishte vendi me numrin më të lartë të të burgosurve politikë për frymë në botë”, tha ai.
