KIEV- Ukraina tha se dy agjentë që punonin për Rusinë janë vrarë pasi një oficer i lartë i inteligjencës ukrainase u qëllua për vdekje të enjten. Kreu i Shërbimit të Sigurisë së Ukrainës (SBU), Vasyl Malyuk, tha në një deklaratë me video se dy agjentë që punonin për shërbimin e sigurisë së Rusisë, FSB, ishin gjurmuar dhe eleminuar pasi i rezistuan arrestimit të dielën në mëngjes.
Vrasja e tyre vjen pasi Kolonel Ivan Voronych u qëllua disa herë në një parking makinash në Kiev në mes të ditës, pasi iu afrua një sulmues i paidentifikuar i cili iku nga vendi i ngjarjes. Të dielën, policia kombëtare e Ukrainës tha se dy agjentët e vrarë ishin qytetarë të një vendi të huaj, pa dhënë detaje të mëtejshme, ndërkohë nga Moska nuk pati asnjë përgjigje të menjëhershme lidhur me rastin.
Pamjet e kamerave të sigurisë të incidentit më 10 korrik – të verifikuara nga agjencia e lajmeve Reuters – treguan një burrë që po dilte nga një ndërtesë në lagjen jugor Holosiivskyi të Kievit pak pas orës 09:00 sipas orës lokale, ndërsa një burrë tjetër vrapoi drejt tij. SBU tha të dielën se të dyshuarit kishin ndjekur lëvizjet e Kolonel Voronych para sulmit dhe iu dërguan koordinatat e një vendi të fshehur ku gjetën një pistoletë me silenciator.
Thuhet se pasi qëlluan për vdekje kolonelin, ata u përpoqën të “fshiheshin”, por u kapën pas një hetimi të përbashkët me policinë kombëtare. SBU-ja përqendrohet kryesisht në sigurinë e brendshme dhe kundërzbulimin, ashtu si MI5 e Mbretërisë së Bashkuar. Por ajo ka luajtur një rol të spikatur në sulmet sabotuese dhe vrasjet thellë brenda Rusisë që nga pushtimi i plotë i Ukrainës nga Moska në vitin 2022.
Burime brenda shërbimeve të sigurisë së Ukrainës i thanë BBC-së se SBU ishte përgjegjëse për vrasjen e gjeneralit të rangut të lartë rus Igor Kirillov në dhjetor 2024. Në prill, gjenerali Yaroslav Moskalik u vra në një sulm me bombë me makinë në Moskë, për të cilin Kremlini fajësoi Kievin.
Vdekjet e kësaj jave vijnë pasi sulmet ruse në Ukrainë kanë arritur nivele rekord. Të martën, Presidenti Volodymyr Zelensky tha se Ukraina ishte përballur me sulmin më të madh ajror rus ndonjëherë. Në qershor, Ukraina regjistroi numrin më të lartë të viktimave civile mujore në tre vjet, sipas OKB-së. Luftimet kanë vazhduar gjithashtu në vijën e frontit, me ushtrinë ruse që po shënon përparime të ngadalta në Ukrainën lindore dhe po rimerr kontrollin e pjesës më të madhe të rajonit Kursk të Rusisë, të cilin forcat e Kievit e pushtuan në një ofensivë të papritur verën e kaluar. Përpjekjet për të negociuar një armëpushim në luftën më shumë se trevjeçare kanë dështuar.
