Një ngjarje e rëndë është regjistruar mbrëmjen e së premtes në zonën e “Ujit të Ftohtë” në Vlorë, ku një person ka mbetur i plagosur rëndë pas një konflikti masiv mes 15 personash pranë një hoteli të njohur. I dëmtuari është një 57-vjeçar me inicialet G.V., i cili është goditur me armë të ftohta dhe ka marrë një plagë të rëndë në kraharor, shumë pranë zemrës.
Ngjarja ndodhi rreth orës 23:00 dhe ka shkaktuar panik të madh në zonë, e cila është mjaft e frekuentuar nga pushues të shumtë, vendas dhe të huaj. Menjëherë pas incidentit, forca të shumta policie kanë mbërritur në vendngjarje dhe kanë nisur hetimet për të zbardhur rrethanat.
Katër persona janë shoqëruar nga Policia e Vlorës për t’u marrë në pyetje, ndërsa hetuesit po punojnë për të identifikuar të gjithë të përfshirët dhe për të sqaruar motivet e sherrit që agravoi në përleshje fizike dhe përdorim të armëve të ftohta.
Ndërkohë, i plagosuri është transportuar me urgjencë në spitalin rajonal të Vlorës, ku ndodhet nën kujdesin e mjekëve në gjendje të rëndë për jetën. Policia ka intensifikuar hetimet për këtë ngjarje të rëndë, e cila ka ngjallur shqetësim të madh mes qytetarëve dhe pushuesve.
