TIRANË- Eraldo Muçi, 30 vjeç, vijon të jetë i zhdukur që prej datës 15 qershor. Lidhur me këtë gjykata ka urdhëruar të kryhen kontrolle në 5 banesa. Sipas gazetares, Klodiana Lala, kontrolle do të kryhen edhe në banesën e Donald Nelës, të njohur si “Tupja”, me të cilin ka pasur kontakt për herë të fundit Muçi.
Siç u raportua disa ditë më parë, Eraldo para se të zhdukej, ka ndaluar tek ferma e kuajve të familjes Sadikaj dhe më pas ka udhëtuar drejt Durrësit. 30-vjeçari është parë në autostradën Durrës-Tiranë dhe nga ai moment nuk ka asnjë të dhënë rreth tij.
Familja ngre dyshime të forta se atij mund ti ketë ndodhur ndonjë ngjarje e rëndë kriminale, për motive hakmarrje, por policia nuk përjashton as pista të tjera. 30-vjeçari i zhdukur pa gjurmë, njihej si një nga miqtë e besuar të Aleksandër Sadikaj i njohur si Sanço.
Si u vra Aleksandër Sadikaj?
Aleksandër Sadikaj, 27 vjeç është vrarë në një atentat me tritol me telekomandë. I riu me precedentë penalë ka qenë duke udhëtuar me makinë në momentin që atentatorët kanë shpërthyer tritolin me telekomandë. Sadikaj u nxorr pa gjymtyrë nga mjeti dhe kalimtarë të rastit e dërguan në spital ku dhe ndërroi jetë. 27-vjeçari është skeduar për një sërë veprash penale si vjedhje, vrasje, plagosje dhe mosbindje e kundërshtim të forcave të policisë. Hetimet janë fokusuar në të shkuarën e të riut.
