MAT- Detaje të reja janë zbardhur në lidhje me vdekjen e 23-vjeçarit Renis Dobra i cili u gjet ditën e djeshme i pajetë pranë liqenit të Shkopetit. Sipas hetimeve dy makina Range Rover dyshohet kanë ardhur nga Rrësheni për të marrë peng 23-vjeçarin.
Ndërsa një makinë tjetër, e ardhur nga Miloti, është futur në rrugën Milot-Burrel dhe ka kontrolluar rrugën 12 km nëse ka lëvizje. Gjithashtu për këtë ngjarje, pritet të shoqërohen 10 persona.
Si ndodhi ngjarja
Babai i Renisit, kallzoi në komisariat pasi nuk ka mundur të lidhet me të birin për disa orë. Menjëherë pas kallzmit në komisariat efektivët nisën kërkimet. Pas disa orëve kërkime u bë me dije se trupi i 23-vjeçarit Renis Dobra u gjet pranë liqenit të Shkopetit, në fshatin Madhesh të Matit. Automjeti me të cilin i riu kishte dalë nga shtëpia kishte rënë në ujë.
Një grup i posaçëm hetimor në drejtimin e Prokurorisë po heton për një vrasje të mundshme, pasi në trupin e të ndjerit ka gjurmë të mbytjes me litar, pasi ka shenja të dukshme në qafë. Po ashtu do të jetë mjekësia ligjore, që do të hedhë dritë mbi mënyrën se si iu ka marrë jeta të riut. Mirëpo pas arritjes në konkluzionin se Renisi mund të jetë vrarë, policia ka bërë me dije se ka arritur të zbardhë një pjesë të mirë të dinamikës.
