KORÇË- Drejtori i ri i burgut të Drenovës është emëruar Lorent Nake. Ministri i Drejtësisë, Ulsi Manja ka rikthyer në detyrë Naken, pasi ai ishte dorëhequr nga ky post në shkurt të vitit 2024, pas një drejtimi prej rreth katër muajsh. Ndërkohë drejtor i policisë së IEVP Drenovë është emëruar Artan Koçibelli. Këto emërime vijnë pas shkarkimit të Fatjon Fashos nga detyra një ditë më parë.
Largimi i Fashos erdhi për shkak të celularit që i është gjetur Laert Haxhiut dhe grupit të tij brenda në burg. Bashkë me Fashon u pezullua nga detyra dhe shefi i Policisë së IEVP Drenovë, Sokol Kacoli. Për sekuestrimin e telefonit SPAK po kryen hetime duke këqyrur jo vetëm aparatin celular, por edhe duke bashkëvepruar me autoritete të tjera, mbasi ka dyshime që bisedat e të fortit të Lushnjës janë sinjalizuar nga përgjimet që po mbahen për një çështje tjetër nën zhvillim e sipër.
Telefoni u gjet disa ditë më parë, gjatë një kontrolli që u krye pas një informacioni të siguruar nga Shërbimi i Kontrollit të Brendshëm dhe Antikorrupsion (SHKB). Menjëherë pas marrjes së sinjalizimit, Forcat Operacionale të Drejtorisë së Përgjithshme ndërhynë në qelinë e Haxhiut dhe sekuestruan telefonin celular. Laert Haxhiu, akuzohet si autori i Masakrës së Lushnjes. Haxhiu u ekstradua më 3 korrik të vitit të kaluar nga Greqia një vit pasi ishte arrestuar në shtetin fqinj.
Si ndodhi Masakra e Lushnjes?
Më 11 shtator 2017, në një lokal në qytetin e Lushnjes, Laert Haxhia dhe Orges Bilbili hynë në lokalin ku ndodhej Zamir Latifi, Jurgen Hoxha, Xhulio Shkurti, për të ekzekutuar Shkurtin, pas dështimit të atentatit të vitit 2015. Shkurti ishte objektivi i kësaj masakre, i cili është nipi i Aldo Bares. Me automatik në krah ata hynë duke qëlluar dhe lanë të vdekur në vend dy të rinjtë, ndërsa Shkurti në këtë moment, ia doli që të shpëtonte pasi nuk ndodhej aty. Nga ngjarja mbetën të vdekur Zamir Latifi dhe Jurgen Hoxha, ndërsa u plagosën Marius Xhepexhiu, pronar i lokalit ku ndodheshin dy viktimat si dhe një kalimtar.
