TIRANA- SPAK ka nisur një procedim penal ndaj gjyqtares së GJKKO-së, Irena Gjoka ndërsa lajmi është nga konfirmuar nga vetë Prokuroria e Posaçme në një përgjigje ndaj avokates Adriana Kalaja. Kjo e fundit bëri kallëzimin për gjyqtaren Gjoka.
Në shkresë, SPAK bën me dije se çështja është regjistruar më 5 qershor të këtij viti për veprën penale “Falsifikimi i vulave, i stampave ose i formularëve”.
Kryetari i Partisë Demokratike, Sali Berisha vazhdimisht ka folur për një vendim të Gjykatës së Janinës në Greqi, sipas së cilit tregon se gjyqtarja Irena Gjoka e Gjykatës së Posaçme është e dënuar me 3 muaj burg dhe gjobë për falsifikimin e një pasaporte dhe një vize në mesin e viteve 2000.
Dyshimet për një dënim të gjyqtares Gjoka në Greqi qarkulluan edhe një vit më parë përmes mediave greke. E pyetur nga BIRN mbi vendimin e dënimit, Gjoka e mohoi kategorikisht.
“Absolutisht nuk jam e dënuar nga asnjë nga autoritetet e drejtësisë greke,” ka thënë gjyqtarja Irena Gjoka.
