TIRANË- Seanca e sotme për procesin e dosjes “Plumbi i artë” në Gjykatën e Posaçme është zhvilluar me tensione dhe debate. Seancën e kaluar GJKKO pranoi kërkesën që avokatët të njiheshin me rrëfimin e bashkëpunëtorit në SPAK, Erjon Alibej të dhëna dy vjet më parë.
Alibej u shpreh se ai ka bërë deklarime shumë të mëdha teksa bëri thirrje që këto deklaratë mos tu vihen në dispozicion avokatëve. Sipas tij avokatëve nuk u intereson se çfarë ka thënë ai por deklaratat e tij janë në interes të kundështarëve që ndodhesh jashtë.
“Unë kam bërë një deklarim shumë të gjerë dhe në gjykimin tim i takon vetëm 25% të këtyre të akuzuarve këtu. Kush e mbron Plarent Dervishajn nga ju? Suel Çelën? Apo njerëz të trafikut të drogës? Për persona që nuk janë pjesë e këtij procesi, unë do isha i pari që do i kërkoja gjykatës të viheshin fashikujt në dispozicion.
Kam dhënë një deklarim shumë të madh, kam përmendur shumë njerëz. Sa herë që do kërkohet nga çdokush, unë mezi pres të ballafaqohem me këdo. Do ju lutesha që deklarimet e mia të mëparshme të mos i viheshin në dispozicion avokatëve. Unë i di shumë mirë lojërat e këtyre. Avokatëve nuk u intereson çfarë kam thënë unë, por kanë interes për kundërshtarët tanë që janë jashtë”, tha ai.
Pas fjalës së Alibejt të pandehurit u ngritën dhe u larguan nga salla. Prokurori Behar Dibra u shpreh se procesverbal është me formë të shkruar dhe se është dokumentim i marrjes në pyetje i Alibej nga 15-20 qershor i vitit 2022. Ai shtoi se materialet kanë informacione që nuk duhet të dalin përtej institucionit deri në momentin e përshtatshëm të procesit, sepse nuk u përkasin palës mbrojtëse apo të pandehurve.
“Ai procesverbal është me formë të shkruar, është dokumentim i marrjes në pyetje i Erjon Alibej, në datat 15-20 qershor 2022. Procesverval transkriptimi, aty ka të dhëna dhe për fakte të tjera. Dhe për aktivitet trafikimi narkotikësh, nuk është objekt i ketij gjykimi. Nuk ka vlerë juridike. Ja vumë në dispozicion gjykatës për të treguar se nuk kemi gjë për të fshehur, apo për ta mbajtur sekret. Por nuk ka vlerë juridike. Dua të mos ketë më diskutime në këtë pikë, por të vazhdojë gjykimi”, tha ai.
