Më 16 maj 2025, Ministri i Mbrojtjes, Pirro Vengu, ka firmosur një tender me vlerë 220 milionë lekë me TVSH, për vënien në funksion të radarit “PRT-17” në ishullin e Sazanit. Por ajo që e kthen këtë tender në një skandal të rëndë kombëtar, është fakti se kontrata i është dhënë pa garë dhe me 99% të fondit limit kompanisë “IDEA-TEL Sh.p.k”, në pronësi të Idlir Karkinit, një emër i skeduar nga shërbimet sekrete shqiptare dhe ndërkombëtare si “bosi” i radarëve të trafikut të drogës.
Karkini, banor i Kavajës dhe i lidhur me qarqe të fuqishme në kupolën politike, rikthehet kështu pas 7 vitesh në sistemin e mbikëqyrjes së kufijve detarë, falë vendimit të ministrit Vengu. Ishte pikërisht ky person që, sipas dokumenteve të sigurisë, gjatë viteve 2014–2017 kontrollonte ndezjen dhe fikjen e radarëve të ushtrisë shqiptare, sipas një grafiku të diktuar nga rrjetet e trafikut të drogës. Në atë kohë, ai operonte nën bekimin e ish-ministres së Mbrojtjes Mimi Kodheli dhe me dijeni të plotë të kryeministrit Edi Rama.
Me tenderin e ri në Sazan, duket se është hapur një tjetër kapitull për përfshirjen e strukturave të inkriminuara në infrastrukturën kritike të mbrojtjes. Ky zhvillim pason një tjetër akt të dyshimtë: më 20 qershor 2025, vetëm katër ditë pas dhënies së tenderit për radarët, ministri Vengu ka udhëtuar drejt Francës për të firmosur një kontratë me kompaninë “Thales”, për instalimin e një radari të ri në të njëjtin ishull. Në mënyrë të papritur, është larguar nga projekti kompania amerikane “Lockheed Martin”, e cila kishte menaxhuar sistemin për pesë vite me radhë.
Ndërkohë, kompania “Thales” deklaroi publikisht më 20 qershor se po mbështet “sovranitetin e hapësirës ajrore të Shqipërisë” përmes radarit të saj “Ground Master 400 Alpha”. Por mbetet e paqartë se çfarë lidhjesh fshihen mes kësaj kontrate ndërkombëtare dhe rikthimit të Karkinit në skenë, përmes një tenderi të ndarë si “pjesë teknike”.
Skandali thellohet edhe më tej: Karkini rezulton të ketë një dosje penale të hapur nga Prokuroria e Kavajës, pas kallëzimit të vetë Ministrisë së Mbrojtjes. Ai është akuzuar për grabitjen me dokumente të falsifikuara të një prone ushtarake, bazën e qitjes kundërajrore në bregdetin e Spillesë me sipërfaqe 9,200 m². Megjithatë, autoritetet ushtarake, përfshirë shtabin e Përgjithshëm dhe vetë Ministrinë, “harruan” të ndjekin çështjen më tej dhe nuk e kërkuan më kthimin e pronës.
Në vend që të përjashtohej nga çdo kontakt me sigurinë kombëtare, Idlir Karkini jo vetëm që nuk është hetuar asnjëherë seriozisht, por tani është rikthyer triumfalisht në kontrollin e radarëve në një prej pikave më strategjike të vendit, Ishullin e Sazanit.
Në këtë rast, përveç përgjegjësisë së ministrit Vengu, heshtja e institucioneve të sigurisë përfshirë SHISH dhe SPAK, është një alarm i rëndë për komprometimin e strukturave të mbrojtjes në Shqipëri./Pamfleti
