TIRANA- Në GJKKO është zhvilluar sot seanca për dosjen “Plumbi i Artë” ku mbrojtësit e të pandehurve kanë ngritur pretendime për mungesë të dokumentacionit të nevojshëm për zhvillimin e pyetjeve ndaj të penduarit të drejtësisë, Erion Alibej.
Sipas informacioneve, avokatët kanë kërkuar dorëzimin e 6 procesverbaleve të deklarimeve të mëparshme të Alibejt, të cilat sipas tyre, nuk i kanë në dispozicion dhe kjo pengon përgatitjen e mbrojtjes. Bëhet me dije se pas kësaj ka patur përplasje verbale mes trupës gjykuese dhe avokatëve.
“Plumbi i artë”
Të pandehurit e dosjes “Plumbi i Artë” akuzohen për disa vrasje, atentate të mbetur në tentativë dhe vjedhje me dhunë, të zbardhura pas dëshmisë së bashkëpunëtorit të drejtësisë Nuredin Dumani. Prokuroria e Posaçme po vijon procesin për dosjen e bujshme, ku ka disa të pandehur. Nuredin Dumani është në cilësinë e të penduarit, si bashkëpunëtor i SPAK, duke zbardhur të paktën 12 vrasje dhe dhjetëra krime të tjera në një dekadë, si dhe porositë që merrte për ekzekutime, me pagesa deri në 200 mijë euro.
