TIRANA- Anëtari i Komisionit të Ankimimeve dhe Sanksioneve (KAS) Ledio Braho foli dje para mediave nga pallati i sportit “Farie Hoti” në Tiranë ku zhvillohet procesi i rinumërimit të votave. Konkretisht bujë bëri deklarata e Brahos pasi u pyet nga gazetarët për kërkesën e socialistit Erion Braçes, i cili në rrjete sociale publikoi po dje një fletë votimi me simbol në kutinë e PS, e cila u shpall e pavlefshme.
Deputeti socialist duke e quajtur këtë simbol “topin e Mato Grudës” shkruan në rrjetet sociale se në rregullore nuk parashikohet si e pavlefshme kur vendoset një shenjë e tillë në fletën e votimit.
“Perse nje vullnet i shprehur me Topin e Mato Grudes eshte konsideruar e pavlefshme? Perse KAS kete shenje e quan te pavlefshme?! Pse zemra eshte e vlefshme dhe topi i Matos jo”, shkruan Braçe.
Postimi
Nga ana tjetër anëtari i KAS u shpreh se PS duhet të bëjë një kërkesë që çdo votë me organin mashkullor gjenital të shpallet e vlefshme dhe Komisioni i Ankimimeve dhe Sanksioneve do dalë me një vendim. Gjithashtu Braho hodhi poshtë akuzat e opozitës për trafikim votash.
“PS siç bëri dhe disa ditë më parë, mund t’i drejtohej KAS dhe të kërkohet që çdo votë me organ mashkullor gjenital të shpallet e vlefshme dhe ne do shprehemi me vendim siç u shprehëm në rastin e parë.
Duhet të kemi parasysh se kur nisi ky proces nisi me ankim për trafikim votash. Duket qartë që nuk kemi arritur në shifra të tilla. Jemi në shifra të ulëta. Bëhet fjalë sot vetëm për bishta kryqesh. Është kryqi brenda apo jashtë kutisë. Ka interpretime votash individuale dhe jo trafikime votash masive. Tani nuk bëhet pis procesi i numërimit. Tani po tentohet me mënyra të tjera të bëhet pis procesi i rinumërimit.
E kam cituar dhe herë tjetër, kemi vënë re se momenti i hedhjes në sistem, ngatërrohet një rresht me një rresh tjetër dhe bëhet një invers. Kjo për mua në rastin më të mirë është gabim njerëzor. Por duhet parë rast pas rasti”, deklaroi Braho para mediave.
Për këto deklarata nuk kanë munguar as komentet, ironitë dhe memet në rrjet. Faqja “Lolita Albania” shkruan mes batutash se është “kurioze” të di se kush është votuesi/ja.
“Unë jam shumë kurioze kush është votuesi/ja. Se po qe i vogël është Erion Braçe, po qe i madh dihet…”,shkruan Lolita.
