KOSOVA- Policia e Kosovës ka gjetur armë në një pronë të politikanit serb të Kosovës në veri të vendit, Aleksandar Arsenijeviç, për të cilat, ministri i Brendshëm në detyrë i Kosovës, Xhelal Sveçla, tha do të mjaftonin “për një njësit terrorist”. Partia e Arsenijeviç, Demokracia Serbe e pranoi të hënën se armët janë gjetur në tokën ku ndodhet shtëpia e pushimit e liderit të saj, megjithëse pretendon se ato janë “të kurdisura” nga autoritetet e Kosovës. Kjo parti nuk dha asnjë dëshmi për ta mbështetur këtë pretendim.
“Këtë presion, Qeveria dhe Policia e Kosovës po e ushtrojnë vetëm disa muaj para zgjedhjeve lokale, në të cilat Demokracia Serbe planifikon të marrë pjesë si kundërshtar i ashpër i politikave antiserbe dhe diskriminuese të Albin Kurtit dhe bashkëpunëtorëve të tij”, tha Demokracia Serbe në një komunikatë.
Zgjedhjet lokale në Kosovë do të mbahen në tetor. Sveçla tha të dielën se gjatë bastisjeve në Vallaç të Zveçanit, që sipas tij u kryen nga Policia e Kosovës dhe Agjencia Kosovare e Inteligjencës nën vëzhgimin e KFOR-it dhe EULEX-it u gjetën raketahedhës, granata dore, tonblonë si dhe armë e municione të llojeve të ndryshme.
Ai tha se armatimi i rëndë u gjet në një objekt që i përket politikanit Aleksandar Arsenijeviç. Demokracia Serbe shtoi se në kohën e bastisjes të dielën, lideri i saj ndodhej në Serbi. Ajo tha se do t’i përdorë të gjitha mjetet ligjore dhe “mjetet tjera të lejuara” për ta mbrojtur atë, dhe se do të vazhdojë të mbrojë interesat e serbëve.
Autoritetet kosovare kanë gjetur armë të llojeve të ndryshme kohë pas kohe në pjesë të ndryshme të Kosovës, kryesisht në pjesën veriore të banuar me shumicë serbe. Në maj, autoritetet thanë se kishin gjetur një punishte të armëve në Mitrovicën e Veriut dhe gjatë aksionit u raportua se u sekuestruan sasi armatimi dhe pjesë të ndryshme të armëve./ REL
