Presidenti i Partisë së Lirisë, Ilir Meta, ka shpërthyer me akuza të forta në drejtim të ish-sekretarit të përgjithshëm të LSI-së, Endrit Braimllari, duke e cilësuar atë si shembullin më të qartë të asaj që ai e quan “transformim politik për llogari të SPAK-ut dhe Rilindjes.”
Përmes një statusi të publikuar në rrjete sociale, Meta hedh akuza të drejtpërdrejta ndaj Braimllarit për qëndrime të manipuluara dhe, sipas tij, për gënjeshtra lidhur me lobimet e Partisë së Lirisë (ish-LSI) në periudhën 2018–2019.
“Endrit Braimllari është shembulli më i gjallë i mënyrës se si SPAK-u arrin t’i konvertojë njerëzit pa karakter në ‘rilindas’ të denjë – gënjeshtarë,” – shkruan Meta.
Ish-presidenti thekson se në kohën kur janë bërë pagesat për lobimet e LSI-së në SHBA, ai nuk mbante postin e kryetarit të partisë, por ishte President i Republikës. Firma mbi kontratat për lobim, sipas tij, mban emrin e vetë Braimllarit.
“Një gënjeshtar ordiner, që përpiqet të fshihet pas harresës, por e vërteta nuk fshihet as me lojëra fjalësh, as me konvertim teserash partie,” – vijon Meta në reagimin e tij.
Ai hedh akuza se vetë ka përfunduar në izolim ekstrem për shkak të kësaj çështjeje, ndërkohë që Braimllari, sipas tij, “gradohet” dhe zë një post të rëndësishëm në administratën vendore si nënkryetar i Këshillit Bashkiak të Tiranës.
Në përfundim të deklaratës së tij, Meta shigjeton drejtpërdrejt edhe kreun e SPAK-ut, Altin Dumanin, duke aluduar se mund të jetë vetë ai që ka dhënë informacione të rreme në dokumente zyrtare.
“Apo mos ndoshta është Altin Dumani që gënjen në shkresën zyrtare të firmosur prej tij?” – përmbyll Meta, duke ngritur pikëpyetje mbi integritetin e organit të akuzës dhe drejtuesit të saj.
Deklarata e Metës vjen në një moment ku hetimet mbi lobimet e partive politike në SHBA kanë zgjuar vëmendjen e opinionit publik, ndërkohë që SPAK ka marrë nën shqyrtim disa pista që lidhen me shpenzimet e pajustifikuara për këtë qëllim nga forca të ndryshme politike në vend.
https://www.facebook.com/share/v/1YyQtQsLiA/?mibextid=wwXIfr
