Botërori për Klube ka hyrë në ditën e tretë në Shtetet e Bashkuara dhe presidenti i FIFA-s, Gianni Infantino, shpreh entuziazëm për ecurinë e turneut, duke e cilësuar një sukses të plotë.
Në një deklaratë pas mbledhjes së Komitetit Ekzekutiv të Shoqatës së Klubeve Europiane (ECA) në Miami, ai hodhi poshtë kritikat se ky kompeticion po rëndon lojtarët dhe po ndikon negativisht në kalendarin e klubeve.
“Botërori për Klube është një arritje historike, njësoj si Botërori i parë për kombëtaret në vitin 1930 në Uruguaj. Ka shumë lojtarë, skuadra dhe kombe që janë gati të tregojnë vlerat e tyre në një skenë globale”, deklaroi Infantino.
Ai nënvizoi gjithashtu rëndësinë e marrëveshjes me ECA-n, duke theksuar se është vendosur një ekuilibër mes interesave të klubeve dhe ekipeve kombëtare:
“Që nga viti 2023 kemi një memorandum mirëkuptimi me ECA-n deri më 2030, i cili ka sjellë stabilitet në botën e futbollit. Kemi arritur të ruajmë një balancë të rëndësishme për të gjithë aktorët e përfshirë”.
Infantino vlerësoi organizimin e turneut në SHBA si një hap gjigant për futbollin e klubeve dhe e quajti këtë edicion “një Kupë të jashtëzakonshme” që do të lërë gjurmë në historinë e këtij sporti.
