TIRANA- Gjykata e Posaçme ka lënë në burg Loran Dushën, administratorin e inceneratorit të Fierit që u deportua në fundjavë nga Zimbabve për në vendin tonë. Mësohet se GJKKO ka konfirmuar masën e sigurisë “arrest me burg” që ishte dhënë në mungesë ndaj tij.
Dusha është pjesë e dosjes me 15 të pandehur që po rigjykohen, pasi Apeli prishi vendimin e shkallës së parë, ku ai ishte dënuar me 7 vite burgim, 4 vite e 8 muaj me gjykim të shkurtuar. Ai ka mbajtur postin e administratorit të inceneratorit të Fierit, ndërsa nuk ishte i pranishëm në senacën e sotme pasi është shtruar në Spitalin e Burgut.
42-vjeçari, Loran Dusha është ekstraduar më 14 qershor nga Zimbabve. Dusha është administratori i inceneratorit të Fierit dhe ishte në kërkim ndërkombëtar. Ai u shpall në kërkim ndërkombëtar pasi GJKKO në vitin 2022, i caktoi masën e sigurisë “Arrest në burg”, për veprat penale “Korrupsioni aktiv i funksionarëve të lartë shtetërorë ose i të zgjedhurve vendorë” dhe “Pastrimi i produkteve të veprës penale ose i veprimtarisë kriminale”, të kryera në bashkëpunim.
Nga hetimet ka rezultuar se Loran Dusha, në cilësinë e administratorit të një kompanie private, ka përfituar fonde publike në mënyrë të paligjshme, përmes faturave dhe pagesave fiktive, për punë dhe shërbime të pakryera.
