ITALIA– etaje të reja janë zbardhur në lidhje me vrasjen e 45-vjeçares shqiptare në Itali. Mësohet se viktima Gentiana Hudhra ishte rrugës për në punë kur u sulmua me thikë nga ish-bashkëshorti i saj, Nikollaq Hudhra. Në një foto të shkrepur nga lart, shihet trupi i pajetë i Gentianës i shtrirë, ndërsa pranë saj, ulur në një stol, ndodhet ish-burri, i cili qëndron i palëvizur, me sytë drejt vendit ku kreu krimin.
Autori i dyshuar u shoqërua menjëherë në komisariat nga Karabinierët, ku iu nënshtrua një marrjeje të gjatë në pyetje nga prokurori i çështjes. Ditën e nesërme pritet të zhvillohet seanca për vërtetimin e arrestit. Sipas mediave italiane, gjatë marrjes në pyetje menjëherë pas arrestimit, burri ka deklaruar se e kreu krimin “për të shpëtuar fëmijët e tij”.
45-vjeçarja ishte nënë e dy vajzave të moshës 21 dhe 23 vjeç. Ajo punonte si kujdestare dhe po shkonte në punë, kur u sulmua papritur në parkun e Viale Benadduci, pak pas orës 20:00. Mësohet se çifti ishte ndarë prej tre vitesh.
