Dashnor Dumani, i cili u ekstradua tre ditë më parë nga Emiratet e Bashkuara Arabe, që prej ditës së djeshme është akomoduar nga Drejtoria e Përgjithshme e Burgjeve, në ambientin e burgut Nr. 313 në Tiranë.
Vendimi për akomodimin e tij në këtë burg, është marrë nga zyrtarët e Drejtorisë së Burgjeve, të cilët në zbatimit të urdhrit të lëshuar nga gjyqtari Bib Ndreca, kanë marrë masat e nevojshme për një akomodim të sigurt brenda në paraburgimin e sigurisë së lartë.
Trajtimi ndryshe i Dashnor Dumanit nuk lidhet me faktin se ai është vëllai i Nuredinit, por edhe për shkak se premisat në vijim janë se ai mund të jetë i penduari i radhës i SPAK, ku mund të flasë për krimet që ka kryer në bashkëpunim me Talo Çelën dhe persona të tjerë.
SPAK po synon të kthejë Dumanin në një të penduar, që tregon në vetë të parë, krimet ku ka marrë pjesë dhe bashkëpunimet kriminale
“Ora News” ka mësuar se Dashnor Dumani i akuzuar për ”Vrasje në rrethana të tjera cilësuese” në dëm të Endrit Alibej, Arben Dylgjerit dhe Erdal Duranay, krim ky i kryer në kuadër të “Organizatës Kriminale”, qëndron i vetëm në qelinë e një sektori sigurie në 313, i cili është i ndarë nga sektori ku qëndron vëllai i tij, Nuredin Dumani.
Dashnor Dumani, pritet të hyjë në programin e mbrojtjes së familjarëve të bashkëpunëtorëve të prokurorisë, kjo pasi ai është vëllai i Nuredin Dumanit, vrasësit me pagesë që prej vitit 2022 ka fituar statusin e të penduarit të SPAK.
Mjafton 1 kërkesë e Nuredin Dumanit, për të shtuar listën e familjarëve të tij në programin e mbrojtjes dhe prokurorët e SPAK, nxjerrin menjëherë urdhrin për trajtimin e veçantë dhe rritur sigurinë për Dashnor Dumanin.
Akuza ndaj Dashnor Dumanit është e rëndë dhe nëse ai do shpallej fajtor për ngjarjen e masakrës së Bradasheshit e ndodhur në 29 dhjetor 2018, ai rrezikon dënimin me burgim të përjetshëm.
