TIRANË- Në fshatin Zallbastar të Tiranës është zbuluar një vatër e re e bagëtive të infektuara me sëmundjen e murtajës në vendin tonë. Një ditë më parë Agjencia e Kombëtare e Veterenarisë dhe Mbrojtjes së Bimëve, bëri me dije se deri më tani janë identifikuar zyrtarisht 7 ferma pozitive në 5 vatra shpërthimi.
Sipas AKVMB, krerët e infektuara po asgjësohen sipas protokolleve strikte veterinare. Po ashtu është kërkuar bashkëpunim urgjent dhe i plotë nga fermerët me agjencinë, duke mos i lëvizur kafshët dhe mos kryer shit-blerje në ferma të tjera. Po ashtu AKVMB bëri thirrje fermerëve të respektojnë masat e biosigurisë në fermë.
Dy ditë më parë Ministria e Bujqësisë dhe Zhvillimit Rural ndau po ashtu një njoftim lidhur me situatën e krijuar në disa zona të prekura nga murtaja e bagëtive. Në njoftim thuhet se Murtaja e Ruminantëve të Vegjël (Peste des Petits Ruminants – PPR) është një sëmundje serioze virale, tepër ngjitëse e ruminantëve të vegjël, e cila ka ngordhshmëri të lartë deri në nivele të 100% të tufës, duke shkaktuar humbje ekonomike, por nuk cenon shëndetin dhe nuk transmetohet te njeriu.
Ministria tha se konfirmimi i parë për sëmundjen e Murtajës në Shqipëri është bërë më 4 qershor 2025, me vendndodhje në fshatin Domen, njësia administrative Postribë, Bashkia Shkodër. Në vijim, rasti i dytë është konfirmuar më 5 qershor në fshatin Vrenjt, njësia administrative Kastriot, Bashkia Dibër; rasti i tretë më 9 qershor në fshatin Val, njësia administrative Martanesh, Bashkia Bulqizë dhe rasti i katërt më 11 qershor në fshatin Polenë, njësia administrative Qendër, Bashkia Skrapar.
Në njoftim gjithashtu theksohej se në Urdhrat e Ministrit është përcaktuar qartë, që për cdo rast të konfirmuar me këtë sëmundje, marrja e masave të kufizimit të lëvizjes së kafshëve të gjalla. Ministria fton të gjithë subjektet dhe fermerët të zbatojnë me përpikëri këtë urdhër, duke bashkëpunuar ngushtë me autoritetet veterinare lokale.
