Ministria për Evropën dhe Punët e Jashtme thotë se po ndjek me prioritet dhe vëmendje të veçantë situatën e shtetasve shqiptarë në Izrael, të prekur nga zhvillimet e fundit. Deri tani nuk ka asnjë raportim për qytetarë shqiptarë të lënduar apo të dëmtuar.
“Aktualisht janë evidentuar pesë shtetas shqiptarë në Izrael: tre me status turisti dhe dy me qëndrim të përkohshëm”, thuhet në reagim. Ata janë në gjendje të mirë shëndetësore, por nuk mund të largohen nga vendi sepse për shkak të situatës, fluturimet janë ndërprerë.
Ambasada jonë në Tel Aviv është në kontakt të vazhdueshëm me shtetasit shqiptarë në Izrael dhe konfirmon se të gjithë janë në gjendje të mirë shëndetësore. Ata janë të informuar dhe po ndjekin udhëzimet e sigurisë së autoriteteve izraelite.
Për çdo informacion shtesë dhe nevoja emergjente, MEPJ informon se shtetasit shqiptarë duhet të kontaktojnë Ambasadën Shqiptare në Tel Aviv në numrat e emergjencës:
Kanë kaluar pak më shumë se 24 orë që kur Izraeli nisi një sulm masiv me dy drejtime kundër Iranit, që synonte shkatërrimin e centraleve bërthamore të vendit dhe rrëzimin e udhëheqjes së tij ushtarake në Teheran.
Irani, i cili u zotua për një “përgjigje shkatërruese” ndaj sulmit, nisi disa valë sulmesh vdekjeprurëse kundër vendeve në të gjithë Izraelin gjatë natës deri të shtunën, me të dyja palët që raportuan vdekje dhe plagosje të shumta.
Sirenat u dëgjuan në Izrael deri të shtunën në mëngjes dhe shpërthime u raportuan në Tel Aviv, Jerusalem dhe Teheran, ndërsa përshkallëzimi i konfliktit rrezikon ta fusë Lindjen e Mesme në një luftë më të gjerë.
