FIER- Një aksident rrugor ka ndodhur në orët e para të mëngjesit të ditës së sotme në aksin Fier-Lushje, afër vendit të quajtur “pushimit të shoferit” .
Sipas raportimeve, një automjet tip “Benz AMG”, i cili udhëtontë me shpejtësi të lartë, ka përplasur nga pas një furgon me pasagjerë që udhëtonte drejt Rinasit. Si pasojë e përplasjes së fortë “Benz”-i theu barrierat mbrojtëse metalike të rrugës dhe përfundoi në kanalin kullues përgjatë autostradës duke u përfshirë nga flakët.
Katër personat që ndodheshin brenda automjetit që përfundoi në kanal, kanë arritur të dalin nga mjeti dhe fatmirësisht kanë shpëtuar, megjithëse janë dërguar në spital për trajtim mjekësor.
Ndërkohë, furgoni me 7 pasagjerë ka përfunduar disa qindra metra më tej nga vendi i përplasjes. Të gjithë udhëtarët kanë marrë lëndime, ndërsa dy prej tyre ndodhen në gjendje të rëndë në Spitalin Rajonal të Lushnjes. Policia ndodhet në vendin e ngjarjes dhe po punon për të zbardhur shkaqet e sakta të aksidentit.
