Pas telefonatës së drejtpërdrejtë në Ora News dhe gazetaren Beti Njuma, është dënuar presidenti i Partisë së Lirisë, Ilir Meta.
Për këtë veprim mësohet se Komisioni i Disiplinës i mbledhur sot dënoi Metën me 10 ditë për të mos kryer asnjë aktivitet sportiv në ambjentet e paraburgimit ku ndodhet që prej tetorit të kaluar.
Ky është denoncimi i Sekretarit të Partisë së Lirisë, Tedi Blushi, i cila tha në një deklaratë për mediat, se presidenti i PL-së u dënua me 10 ditë pse dha një intervistë live në Ora News para dy ditësh.
Blushi i quan këto përpjekje qesharake të narko regjimit dhe SPAK për të heshtur opozitën dhe për të izoluar liderët e tyre.
“Rasti me qesharak, ndodhi sot kur Komisioni Disiplinor i IEPV “Jordan Misja” dënoi Presidentin Meta me 10 ditë për të mos ushtruar aktivitete sportive në ambientet e paraburgimit vetëm pse pak ditë më parë realizoi live një intervistë me gazetaren Beti Njuma.
Këto praktika sa qesharake, po aq të neveritshme dhe represive, dëshmojnë fytyrën e vërtetë dhe degradimin e Narkoregjimit, që me ndihmën e SPAK po bëjnë çdo përpjekje për të goditur dhe izoluar liderët e opozitës“, tha Blushi.
Sakaq, Blushi edhe një herë denoncon masakrën elektorale në zgjedhjet e 11 majit, teksa bën me faj edhe SPAK, task forca e së cilës sipas Blushit rezultoi gënjeshtër.
Meta vijon që prej tetori në paraburgimin 313 pa asnjë provë dhe fakt sipas Blushit, një akt tërësisht politik urdhëruar nga kryeministri Edi Rama.
