TIRANË- Dy persona janë arrestuar mbrëmjen e djeshme në flagrancë dhe 10 të tjerë janë proceduar penalisht. Ata akuzohen për prishje të rendit e qetësisë dhe hedhje të sendeve të forta në fushë, gjatë zhvillimit të ndeshjes së futbollit Shqipëri- Serbisë, në stadiumin “Arena Kombëtare”.
Gjithashtu bëhet me dije se në pranga është vënë edhe një punonjës i shërbimit të sigurisë pasi është konstatuar duke marrë para nga dy shqiptarë të Kosovës me qëllim shmangien e kontrollit fizik të tyre. Dy shqiptarët e Kosovës u proceduan gjithashtu në gjendje të lirë.
NJOFTIMI I POLICISË:
Specialistët për Hetimin e Krimit të Komisariatit të Policisë Nr. 1 arrestuan në flagrancë shtetasit D. I., 31 vjeç, dhe J. Ll., 29 vjeç, si dhe proceduan në gjendje të lirë 10 shtetas të tjerë, për prishje të rendit e qetësisë dhe hedhje të sendeve të forta në fushë, gjatë zhvillimit të ndeshjes së futbollit midis “Shqipërisë dhe Serbisë”, në stadiumin “Arena Kombëtare”. Gjithashtu, në vijim të veprimeve, është arrestuar shtetasi B. Ç., 45 vjeç (punonjës i SHRSF), pasi është konstatuar duke marrë para nga 2 shtetas të Kosovës me qëllim shmangien e kontrollit fizik të tyre. Dy shtetasit kosovarë u proceduan gjithashtu në gjendje të lirë.
Ndeshja e luajtur mbrëmjen e djeshme në stadiumin “Arena Kombëtare” përfundoi pa asnjë gol të shënuar. Sfida nisi mirë për kombëtaren shqiptare, ku u fitua dhe një penallti nga Elseid Hysaj. Por festa për goditjen e penalltisë së fituar nga Hysaj, zgjati shumë pak, pasi topi i gjuajtur nga Rey Manaj u ndal nga portieri serb. Pjesa e dytë nisi po ashtu me disa raste për gol, por asnjë prej tyre të finalizuar. Raste ka pasur dhe nga kombëtarja serbe, por Strakosha nuk gaboi me ruajtjen e portës shqiptare.
Ndeshja e djeshme është e vlefshme për eleminatorët e Botërorit 2026. Shqipëria dhe Serbia janë pjesë e Grupit K për ndeshjet kualifikuese në Kampionatin Botëror 2026, së bashku me Letoninë, Andorrën dhe Anglinë. Aktualisht, Shqipëria ka 4 pikë dhe është e dyta në këtë grup, ndërkaq Serbia mori sot pikën e vetme. E gjithë Tirana është blinduar, për shkak të rëndësisë së madhe që ka kjo ndeshje dhe për shkak të historisë së ndeshjeve të kaluara me Serbinë.
