Belgjika është tronditur nga vrasja e një nëne 46-vjeçare dhe vajzës së saj 6-vjeçare, të cilat u gjetën të vdekura pas një zjarri të qëllimshëm në shtëpinë e tyre në Hasrode, pranë Oud-Heverle, në qendër të vendit.
Zyra e Prokurorit Publik në Leuven njoftoi se dy gratë, të cilat i përkisnin një familjeje ukrainase që jetonte në Belgjikë prej tre vitesh, kishin plagë të shumta me thikë, duke bërë që rasti të trajtohet si vrasje e dyfishtë. Zjarri që shpërtheu në katin e parë të banesës dyshohet se është ndezur qëllimisht.
Thirrja për zjarrin u bë rreth orës 9:30 të mëngjesit të së shtunës. Zjarrfikësit, të cilët mbërritën në vendngjarje, vunë nën kontroll flakët rreth orës 10:20, por në banesë gjetën trupat e të dyjave pa shenja jete. Nëna kishte ndërruar jetë nga plagët e thikës, ndërsa vajza 6-vjeçare u gjend pa ndjenja dhe përkundër përpjekjeve për ringjallje, nuk mundi t’i mbijetojë.
Familja kishte emigruar nga Ukraina, ndoshta për shkak të luftës, dhe babai i fëmijëve aktualisht shërben në frontin ushtarak. Djali 16-vjeçar ishte në shkollë gjatë ngjarjes dhe është jashtë rrezikut, duke u mbajtur aktualisht nën kujdesin e shërbimeve sociale dhe psikosociale.
Komuniteti lokal është në zi dhe Bashkia ka njoftuar hapjen e një libri ngushëllimesh për të shprehur solidaritetin me familjen, duke nisur nga e marta, me një periudhë treditore ngushëllimesh. Në shkollën ku mësonte vajza, stafi po informon dhe mbështet nxënësit, duke planifikuar diskutime për tragjedinë pas pushimeve.
Hetimet për ngjarjen vazhdojnë, ndërsa autoritetet nuk kanë bërë ende njoftime për ndonjë të dyshuar apo shenja që të çojnë në identifikimin e autorit.
