BRUKSEL- Deputetja e Partisë Demokratike, Jorida Tabaku, ka komentuar zhvillimet e fundit politike në Bruksel që lidhen me vendin tonë për sa i përket rezolutave dhe vendimeve që u morën nga Parlamenti Europian, mbi zgjedhjet e 11 majit. Tabaku tha për Syri TV se Parlamenti Europian është i shqetësuar për cënimin e zgjedhjeve në Shqipëri, pasi këto janë zgjedhjet e para parlamentare me negociata të hapura dhe në këtë fazë nuk ka më tolerime për standardet demokratike të një vendi.
Ajo shtoi se të gjitha çështjet që lidhen me zgjedhjet janë pjesë e grup-kapitullit të parë themeloret që nga organizimi i zgjedhjeve, presioni mbi administratën publike, përdorimi i burimeve, lidhja me korrupsioni me krimin e organizuar. Për këto Tabaku tha se janë denoncuar në Parlamentin Europian.
Deputetja tha procesi i integrimit nuk është marketing politik, nuk është një marketing që mund të flitet për një datë, por sipas saj, kërkon një punë të lodhshme, angazhim dhe vullnet politik.
“Ka pasur shumë takime pune me kolegë të Parlamentit Europian, të të dyja kampeve politike edhe të PPE-ve por dhe të socialistëve, të cilët janë të shqetësuar sepse këto ka qënë zgjedhjet e para me negociata të hapura. Në momentin kur janë hapur grup-kapitujt dhe Shqipëria ka një rrugëtim dhe objektiv tjetër, është e rëndësishme që procesi i integrimit të shikohet a zbatohet apo jo në praktikë. As shqiptarëve, as ne as Parlamentit Europian nuk i duhet një proces integrimi në letër, por ne na duhen standarde që zbatohen në praktikë.
Zgjedhjet janë shembulli më i mirë dhe elementi i parë për t’u vlerësuar. Të gjitha çështjet që lidhen me zgjedhjet janë pjesë e grup-kapitullit të parë themeloret. Organizimi i zgjedhjeve, presioni mbi administratën publike, përdorimi i burimeve, lidhur edhe me problematikat e tjera më gjerë, lidhja me korrupsioni me krimin e organizuar dhe ajo që është më e rëndësishme, çfarë do të ndodhë? Do të ndodhë ngritja e shqetësimit për këto zgjedhje që me të vërtetë ishin problematike dhe kishin cënuar standardet e demokracisë apo do të harrohet.
Parlamenti Europian sot na konfirmoi se Shqipëria sigurisht që është në fokusin e diskutimeve edhe për faktin që janë hapur negociatat dhe për faktin që tashmë në procesin e integrimit nuk ka më mbyllje sysh dhe kalim të fajit te të tjerët, se Shqipëria duhet të sillet si një vend me standarde dhe zgjedhjet fatkeqësisht treguar se Shqipëria nuk është një vend me standarde. Procesi i integrimit nuk është marketing politik, nuk është një marketing që ti thua do kem një datë dhe do arrij një datë, por kërkon një punë të lodhshme kërkon angazhim dhe vullnet politik. Me zgjedhjet u tregua që ky vullnet politik nuk ekziston”, tha Tabaku.
