TIRANA- Detaje të reja janë zbardhur në lidhje me plagosjen e 15-vjeçarit, kamarier, ditën e djeshme në ambientet e një picerie në zonën “Ali Demi”. Policia bën me dije se ka identifikuar dhe shpallur në kërkim 21-vjeçarin Aldi Neziri (motorist) i cili dyshohet si autori i plagosjes.
Sipas informacioneve, në tavolinë kanë qenë 3 persona, i mituri me kushërirën e tij dhe autori i dyshuer i plagosjes. 21-vjeçari pasi ka nxjerrë pistoletën stilolaps, e ka shkrepur dhe plumbi e ka kapur 15-vjeçarin në qafë. Pistoleta stilolapsi nuk konsiderohet armë zjarri e mirëfilltë, por e modifikuar. Gjithashtu bëhet me dije se 15-vjeçari nuk është treguar bashkëpunues me hetuesit kur është marrë në pyetje. Ndërkohë, arma në fjalë nuk është gjetur.
Nga ana tjetër, kushërira e tij është marrë në hetim në gjendje të lirë për “moskallëzim krimi”. Bëhet me dije se vajza u ka thënë hetuesve se ngjarja ka ndodhur jashtë lokalit dhe plumbi ka ardhur nga lartë, pra plumb qorr. Pasi hetuesit janë konsultuar me bluzat e bardha, këndi i plumbit në qafë nuk ishte nga lartë poshtë, por drejtë. Ndërkohë, 15-vjeçari nuk rezulton të ketë qenë i siguruar apo brenda rregullave të ligji të punës për shkak të moshës.
Po ashtu në lidhje me ngjarjen janë arrestuar dhe tre punonjës të picerisë, Ferit Basha, Andi Hyka dhe Keivin Bala për veprat penale “Moskallëzimi i krimit” dhe “Veprime që pengojnë zbulimin e të vërtetës” pasi dyshohet se kanë pastruar vendin e ngjarjes dhe kanë fshehur pamjet filmike të kamerave të sigurisë në ambjentet e picerisë. Në kërkim është shpallur dhe administratori 24-vjeçar i picerisë ku dhe ndodhi ngjarja, Leonardo Mejdanin. Mësohet se i mituri kishte rreth 2 javë që ishte punësuar në piceri, pasi ishte biznes i kushëririt e tij dhe kishte nisur punë për ta ndihmuar.
