TIRANA- Komisioni i Ankesave dhe Sanksioneve u mblodh sot për të shqyrtuar ankimimin e Partisë Demokratike-ASHM, për tabelat e rezultateve të zgjedhjeve të 11 majit për qarkun e Lezhës, të miratuara nga KQZ. Ky ankimim po shqyrtohet pas atyre në Kukës, Berat, Dibër, Vlorë dhe Gjirokastër. Sot nuk u arrit të merrej një vendim për qarkun e Kukësit, mbledhje e shtyrë nga e premtja e kaluar.
Ndërkohë sërish, mbledhja e sotme u shty për datën 4 qershor. Përfaqësuesi i PD-ADSHM Marash Logu kërkoi gjatë fjalës së tij edhe pavlefshmërinë e rezultatit të certifikuar nga KQZ dhe përsëritjen e zgjedhjeve në këtë qark, duke renditur edhe shkaqet që sipas tij konfirmojnë parregullsitë dhe shkeljet e Kodit Zgjedhor.
Logu renditi edhe procedimet që ka bërë Prokuroria e Lezhës dhe SPAK për dia raste ku ka shoqëruar përfaqësues të PS-së dhe i ka marrë në pyetje. Ai akuzoi Policinë se ishte përfshirë në fushatë elektorale, duke marrë në referim për procedim penal për shpifje ndaj Gjin Gjonit, pasi sipas tij efektivët nuk e kanë këtë kompetencë.
Sips Logut, edhe kryebashkiaku Pjerin Ndreu është përfshirë në urdhra të paligjshëm që nga asfalti elektoral, tek implikimi i zyrtarëve të lartë në fushatë elektorale, presion, përdorim të administratës, përdorim edhe të fondeve publike.
“Nuk mund të referojë Policia ndaj një kandidati të PD-ADSHM ndjekje penale për shpifje në Prokurori, e kjo tregon përfshirje të saj në fushatë. Madje edhe procedimi i kandidatit tonë pse i ka kërkuar votën një qytetari te shtëpia (rasti i denoncimit të Gjin Gjonit para 11 majit nga një qytetar i Lezhës), kjo është e pakuptueshme”, tha Logu.
