TIRANË- Një 43-vjeçar është vënë në pranga nga policia në Tiranë. Mësohet se arrestimi i tij ka ardhur pasi ai ishte i shpallur në kërkim. I arrestuari është identifikuar si Klement Zguro.
Zguro rezulton i dënuar me 11 vite burg për vrasje me dashje dhe armëmbajtje pa leje. 43-vjeçarit i kanë mbetur për të vuajtur 8 vite e 11 muaj burgim. Policia njofton se arrestimi u bë në rrugën “Mikel Maruli”.
Njoftimi i plotë:
Tiranë/Finalizohet operacioni policor i koduar “END”. Operacioni nga Komisariati i Policisë Nr. 3, për kapjen e personave të shpallur në kërkim, me rrezikshmëri të lartë shoqërore në fushën e krimeve kundër personit. Kapet 43-vjeçari i dënuar me 11 vite burg, për vrasje me dashje dhe armëmbajtje pa leje.
Në vijim të punës për lokalizimin e vendndodhjes dhe kapjen e personave në kërkim, shërbimet e Komisariatit të Policisë Nr. 3 kanë bërë lokalizimin e vendndodhjes së një personi të shpallur në kërkim për vrasje me dashje dhe armëmbajtje pa leje.
Mbi bazën e informacioneve të siguruara në rrugë operative, u organizua dhe u finalizua me sukses operacioni policor i koduar “END”, si rezultat i të cilit u bë kapja, në rrugën “Mikel Maruli”, e shtetasit në kërkim Klement Zguro (Kaçolli), 43 vjeç, banues në Tiranë.
Gjykata e Apelit Korçë e ka dënuar këtë shtetas me 11 vite burgim, për veprat penale “Vrasja me dashje” dhe “Armëmbajtja pa leje”. 43-vjeçarit i kanë mbetur për të vuajtur 8 vite e 11 muaj burgim. 43-vjeçari iu dorëzua DVP Korçë, për veprime të mëtejshme procedurale.
