Një nga zonat më të lakmuara të kryeqytetit, ajo pranë liqenit artificial të Tiranës, është shndërruar në tokë premtimesh dhe dhuratash për emra të afërt me pushtetin. Së fundmi, në heshtje dhe pa garë, afro 4.2 hektarë pasuri publike, pjesë e Parkut të Madh të Tiranës, janë dhënë për përdorim një subjekti të lidhur me Rigels Rajkun, i njohur si Noizy, këngëtari që në zgjedhjet e fundit u kthye në një poster elektoral të Partisë Socialiste, duke kënduar në mitingje dhe duke promovuar “Shqipërinë që duam” të Edi Ramës.

Dokumentet e siguruara nga Publik.al zbulojnë se përdorimi i kësaj prone, në kufijtë e një prej zonave më të mbrojtura të qytetit, është formalizuar nga Bashkia Tiranë me procedura të përshpejtuara, dhe  sipas burimeve të brendshme  është kryer “me urdhër nga lart”, specifikisht nga vetë Edi Rama, që sot de facto ushtron pushtet të dyfishtë si kryeministër dhe drejtues real i Bashkisë Tiranë përmes Erion Veliajt.

Një zyrtar i lartë bashkiak, në kushte anonimiteti, konfirmoi për redaksinë tonë se “kjo është vetëm faza e parë” e asaj që po konsiderohet si një projekt “artistiko-sportiv”, por që në thelb është një privatizim i maskuar i hapësirës publike, për t’u kthyer në skenë koncertesh, ambiente eventesh dhe sipërfaqe biznesi të kontrolluar nga njerëzit e afërt me pushtetin.

Për çfarë shërben kjo tokë?

Sipas planit të miratuar nga Këshilli Bashkiak, zona do të kthehet në një “qendër aktivitetesh kulturore, artistike dhe argëtuese me ndikim për rininë”, por mungon çdo studim i ndikimit mjedisor, çdo konsultim publik, dhe  më e rëndësishmja, çdo procedurë e hapur konkurruese. Edhe më shqetësuese është fakti që këto hapësira po i dorëzohen individëve që kanë kontribuar drejtpërdrejt në fushata të PS-së, si Noizy, që shpesh herë ka dalë në skenë si fytyrë e sponsorizuar e propagandës rinore të Rilindjes.

Skenari i njohur: Favore për artistë servilë të pushtetit

Ky nuk është rasti i parë kur artistë të afërt me qeverinë përfitojnë prona publike. Më herët, Bashkia Tiranë ka dhuruar troje, ambiente dhe leje ndërtimi për figura të artit dhe sportit që janë përdorur politikisht në fushata apo kanë dhënë “mbështetje kulturore” për projektet e qeverisë. Skema është e njëjtë: vendim i shpejtë, mungesë transparence, dhe një justifikim “social” që mbulon kapjen private të aseteve publike.

Liqeni, pronë publike në zhdukje

Parku i Liqenit, që në letër duhet të mbetet “hapësirë publike e paprekshme”, është kthyer në një zonë eksperimenti për klientelizëm politik dhe projektim të ndikimit elektoral përmes tokës. Nga Veliera tek Sheshi Skënderbej, nga Teatri Kombëtar tek liqeni, e njëjta dorë politike dhe ekonomike po betonon gjithçka që dikur ishte e përbashkët.

Pyetje për SPAK-un që nuk vijnë kurrë:

• Me çfarë procedure u përzgjodh Noizy si përfitues i këtij terreni?
• A është kjo tokë dhënë për përdorim falas apo me qira simbolike?
• A është nënshkruar ndonjë kontratë koncesionare apo partneritet publik-privat për këtë zonë?
• Ku është transparenca që duhet të shoqërojë përdorimin e pasurisë publike?
• Dhe, më e rëndësishmja: kush përfiton realisht nga ky “projekt për rininë”?

Në një vend ku publiku shpërfillet dhe prona e përbashkët përdoret si mall partiak, dhurimi i 4.2 hektarëve tokë publike për një këngëtar që bën fushatë për pushtetin është jo vetëm abuzim me pronën publike, por edhe fyerje për qytetarinë.

Nëse sot jepet 4.2 ha pa asnjë pyetje, nesër mund të jepen 10. Se ka plot aty, apo jo?