Gazetarja Klodiana Lala, e ftuar në emisionin “Të Paekspozuarit” në MCN TV, ka dhënë detaje për disa nga personazhet kyç të trafikut të drogës, të idenfitikuar nga hetimet e SPAK dhe antimafias italiane në operacionin “Ura”.
Njëri prej personazheve është Adi Çoba, për të cilin Lala tha se dyshohet si personi që shpërndante sasi të mëdha të narkotikëve dhe furnizohej nga grupi i Elvis Doçit, i njohur si Visi i Pojës.
“Adi Çoba, konsiderohet si kreu i një nën grupi në Itali. Furnizohej nga grupi i Visit të Pojës dhe shpërndan sasi të mëdha. Mendohet se është nga grupimet që bënte shpërndarjen dhe përmes kompanive të tij pastronte edhe paratë. Kishte kompani që ishte aktive në Shqipëri. Paratë futeshin më autobuzë nga Italia drejt Shqipërisë. Rezulton se vinin 2-3 herë në javë rreth 150 mijë euro dhe mblidheshin nga burri i mbesës së Xhevdet Troplinit. Punohej me një grup shoferësh të përcaktuar.
Paratë investoheshin në fusha të ndryshme. A është investuar e gjitha? Mbetet për tu hetuar.
Nexhmedin Danaj, është person që bënte transfertat e parave dhe televizionin kabllor dyshohet ta ketë ngritur nga para të aktivitetit kriminal”, tha ndër të tjera Lala.
