Policia e Durrësit ka identifikuar dhe shpallur në kërkim dy persona të dyshuar për përfshirje indirekte në atentatin ndaj 29-vjeçarit Ermir Dedja. Sipas burimeve nga grupi hetimor, hetimet po avancojnë në drejtimin e duhur dhe kanë ndihmuar në hedhjen dritë mbi mënyrën e organizimit të atentatit.
Vrasja e Ermir Dedjas dyshohet të jetë një krim i mirëorganizuar dhe i planifikuar në detaje, ku dyshohet se janë përfshirë edhe shtetas të huaj.
Dy personat e shpallur në kërkim dyshohet se kanë luajtur një rol të rëndësishëm në sigurimin e logjistikës së nevojshme për autorët e krimit, përfshirë edhe mjetin që u përdor për realizimin e atentatit. Sipas hetuesve, autorët e dyshuar të ekzekutimit janë dy individë të tjerë, ndërsa bashkëpunëtorët kanë vepruar për të krijuar kushtet që vrasja të kryhej pa lënë gjurmë.
Ekspertët e kriminalistikës kanë arritur të rikuperojnë disa prova nga mjeti i djegur në zonën e Gërdecit, të cilat janë dërguar për analizë në laboratorin shkencor. Rezultatet pritet të ndihmojnë më tej në identifikimin e autorëve dhe zbardhjen e plotë të ngjarjes.
Policia e Durrësit ka zbuluar se mjeti i përdorur në këtë atentat, i cili më pas u braktis në Gërdec dhe iu vu flaka, ka hyrë në territorin shqiptar vetëm një ditë para ngjarjes. Automjeti është sjellë nga porti i Durrësit nga një shtetas maroken, i cili është larguar nga Shqipëria ditën pas vrasjes, duke e konsideruar “misionin e përmbushur”.
Autoritetet shqiptare po kërkojnë ndihmën e partnerëve ndërkombëtarë për të lokalizuar dhe arrestuar shtetasin maroken të dyshuar.
Pista kryesore e hetimit lidhet me përfshirjen e viktimës në aktivitete të shumta kriminale gjatë viteve të fundit. Ermir Dedja, një emër i njohur për policinë jo vetëm në nivel lokal, dyshohet se ishte objekt i larjes së hesapeve në botën e krimit.
Ngjarja e rëndë ndodhi në orët e vona të së hënës, kur Dedja ndodhej në shoqërinë e dy personave të tjerë. Ai u qëllua me armë zjarri dhe një plumb në gjoks i shkaktoi vdekjen e menjëhershme. Hetimet vazhdojnë me intensitet për të çuar para drejtësisë autorët dhe bashkëpunëtorët e kësaj vrasjeje të rëndë.
