Kryetarja e PD Shkodër, Eliona Kodra Shkreli ka reaguar ndaj kryetarit të bashksië së Shkodrës, Benet Becit, i cili ka nisur hakmarrjen politike duke shkarkuar nga puna demokratët.
Shkreli shkruan se, kërcënimet ndaj demokratëve kanë filluar që në fushatë nga stafi i Becit, të cilët paralajmëronin se kush nuk merr pjesë në mitingjet e Ramës do të pushoheshin nga puna.
Shkreli shkruan se arsyetimi për pushimin nga puna të një demokrati në Bashkinë e Shkodrës, është se ka braktisur vendin e punës.
Shkreli thotë se, demokratët në Bashkinë e Shkodrës po pushohen nga puna për t’u zëvendësuar nga patronazhistët.
Reagimi i Eliona Kodra Shkrelit
Hakmarrje politike…
Benet Beci ka filluar hakmarrjen politike duke shkarkuar nga puna demokratët të cilët nuk iu bindën dhe nuk pranuan të bëhen servilë të Tij dhe të Rilindjes!
Në fakt, kërcënimi ndaj demokratëve ka filluar që në fushatën zgjedhore ku stafi i ngushtë i kryebashkiakut nën hetim, kërcënonte punonjësit e djathtë se do pushoheshin nga puna nëse nuk do merrnin pjesë në mitingjet e Ramës apo nëse nuk do votonin Partinë Socialiste.
Akuzon një demokrat se “paska braktisur vëndin e punës e si rrjedhojë paska pasur pasoja të rënda në mospërmbushjen e detyrave funksionale”, por ndërkohë harron bashkiaku Beci se, jo shumë larg nga sot, e gjithë administrata e Bashkisë braktiste detyrën dhe shërbimin ndaj qytetarëve për t’u vënë nën shërbim të ardhjeve të kryeministrit në Shkodër, për të qënë prezent e për të mbushur sallat, anipse’ orari zyrtar i punës nuk kishte mbaruar!
Me urdhër të Benet Becit, disa herë Bashkia Shkodër ka “mbyllur dyert” e shërbimit brënda orarit zyrtar, për të mbushur mitingjet e Ramës, madje edhe nën kërcënimin e heqjes nga puna për ata punonjës që hezitonin të bëheshin pjesë e farsës propagandistike të sallave e shesheve, gjoja të stërmbushura me qytetarë të kënaqur nga qeverisja Rama-Beci!
Largime të tilla ishin paralajmëruar, dhe vetëm pak ditë pas daljes së rezultateve të zgjedhjeve, Beci nën hetim fillon hakmarrjen politike të menjëhershme, pa pritur shumë gjatë.
Një rast i paprecedent, që privon lirinë e individit për të besuar në një krah të kundërt politik. Ky është fakti se administrata e Bashkisë Shkodër po “pastrohet” nga demokratë ndershëm për t’u zëvendësuar me patronazhistë, servilë dhe shërbëtorë e ushtarë të bindur të Rilindjes Benetiane!
Pikërisht këto lëvizje të turpshme po e kthejnë Shkodrën pas, në kohën e komunistëve të cilët internonin, torturonin dhe pushkatonin idealistët e lirisë vetëm për faktin se refuzonin të besonin dhe t’i bashkangjiteshin idealeve komuniste të ‘diktatorëve’ në pushtet! Si në atë kohë, ashtu po veprohet edhe sot nga një kryebashkiak i cili i ka ditët e numëruara në krye të Bashkisë Shkodër. Sot, Beci nuk internon por lë’ pa punë këdo që nuk i ngjizet partisë së Tij!
Inkurajoj çdo demokrat/e të denoncojë pranë Partisë Demokratike presionet apo largimet nga puna në secilin institucion publik që drejtohet nga shefa e drejtorë rilindas. Terrori komunist nuk duhet të zëjë vënd më në Shkodrën e lirë, sepse shkodranët s’janë mësuar kurrë të përkulen ndaj padrejtësive apo mohuesve të lirisë.
Këto janë lëvizje të turpshme ku pas humbjes së Shkodrës, rilindasit riaktivizojnë mentalitetin komunist. Shkodra nuk fitohet kurrë me dhunë e presion sepse e ka treguar në historinë e saj se ka mbrojtur me “gjak” lirinë dhe demokracinë!
Ky është një akt i turpshëm dhe i paprecedent i cili kërkon reagim qytetar për të mos rënë në përsëritje të rasteve dhe historisë!
