TIRANË- Përfaqësues nga Departamenti “Brain Gain” në Partinë Demokratike, Nikola Kedhi në një deklaratë për mediat u shpreh se ka pasur një numër të konsiderueshëm fletësh votimi në Greqi me shenjën e njëjtë të ‘X’. Ai ngriti pyetjen se sa mund të jetë probabiliteti që e njëjta kaligrafi të jetë në 60 fletë votimi.
Kedhi theksoi se është e papranueshme që kaligrafi i njëjtë të shfaqet në 50-60 fletë votimi, duke shtuar se kjo mund të ndodhë vetëm në rastin kur votuesit janë anëtarë të një familjeje, por jo për një numër kaq të madh njerëzish. Ai shtoi se ka patur edhe raste të tjera ku “X” është shkarravitur. Sipas tij këto janë sinjale që tregojnë se disa votues kanë qenë nën presion.
“Ka pasur fletë votimi të shumta me shenjën e njëjtë të ‘X’. Tani, më thoni, cili është probabiliteti që të jetë e njëjta kaligrafi në 50-60 fletë votimi? E kuptojmë kur janë anëtarë të një familjeje, por jo për 50-60 persona të ndryshëm. Ka pasur raste të tjera kur ‘X’ ka qenë i shkarravitur. Këto janë sinjale që na bëjnë të kuptojmë se disa votues janë ushtruar presion për të deklaruar se votuan për ju, dhe, çuditërisht, kjo shenjë ‘X’ është e njëjtë për të gjithë për PS.
Nga ana tjetër, për Vlorën është një kaos i plotë. Ka pasur një përqindje të caktuar për PS dhe PD, e cila është ruajtur në përgjithësi. Por këtu, jo vetëm që nuk janë ruajtur, por ka një diferencë të madhe mes rezultateve të diasporës në Greqi dhe atyre brenda vendit në Vlorë. Nëse në Vlorë PD është rreth 30%, në rezultatet e Greqisë arrijmë vetëm 14%, dhe e gjithë kjo shkon ende më poshtë. PS arrin të ketë 85-86% në të gjitha kutitë e votimit. Kjo është e pamundur nga ana statistikore,” tha ai.
