Trajneri italian, Gennaro Gattuso, pritet të drejtojë ndeshjen e fundit në shtëpi me Hajduk Split këtë fundjavë ndaj HNK Rijeka-s, ndonëse ka ende një vit kontratë me klubin kroat. Gattuso ka vendosur të largohet në fund të sezonit, pavarësisht se kjo përballje do të luajë një rol vendimtar për titullin kampion, pasi Rijeka aktualisht kryeson renditjen me një pikë më shumë se Dinamo e Zagreb, vetëm dy javë para fundit të kampionatit.
Në konferencën për shtypin, trajneri 46-vjeçar deklaroi:
“Kjo ndoshta do të jetë ndeshja ime e fundit në stadiumin ‘Poljud’. Kam ende një vit kontratë, por po punojmë që të largohem në fund të sezonit. Për sa i përket një kompensimi për largimin, nuk do ta pranoj. Nuk e meritoj. Do të marr vetëm atë që më takon me të drejtë, sepse për mua paraja nuk ka qenë asnjëherë e rëndësishme.”
Gattuso foli edhe për atmosferën e tensionuar që e ka shoqëruar ekipin në javët e fundit:
“Tifozët janë të zemëruar. Policia na ka mbikëqyrur për disa ditë pasi ishin paralajmëruar protesta. Por më ka prekur pasioni i tyre. Hajduku këtu është më shumë se futboll, është stil jete. E ndien krenarinë që kanë për klubin, dhe unë jam vërtet i lumtur që kam pasur mundësinë të drejtoj një ekip kaq të rëndësishëm. Kuptoj zhgënjimin e tyre, kemi qenë shumë afër ëndrrës dhe e imagjinoj si ndihen. Ata meritojnë më shumë, dhe shpresoj t’i përshëndes me një fitore në ‘Poljud’.
Nëse kjo do të jetë me të vërtetë ndeshja e fundit e Gattusos me Hajdukun, ajo premton të jetë një mbrëmje e mbushur me emocione dhe me shumë rëndësi për fatin e kampionatit kroat.
