Partia Socialiste vijon të udhëheqë bindshëm në rang kombëtar në zgjedhjet parlamentare, duke marrë deri më tani 236,862 vota ose 52.54% të totalit. Në vend të dytë renditet koalicioni PD-ASHM me 155,021 vota ose 34.39%.
Megjithatë, në Vaun e Dejës panorama është ndryshe. Deri tani, pas numërimit të 28 nga 53 qendra votimi, kryeson Partia Socialdemokrate (PSD) e Tom Doshit me 3,232 vota ose 45.99%. PD-ASHM mban vendin e dytë me 2,333 vota ose 33.20%, ndërsa Partia Socialiste renditet e treta me 1,286 vota ose 18.30%.
Ky rezultat lokal duket se ka qenë i njohur për drejtuesit politikë, pasi gjatë fushatës, kryeministri Edi Rama paralajmëroi publikisht kryebashkiakun Kristian Shkreli duke i thënë: “Mos luaj me dy porta”, një deklaratë që tani merr më shumë kuptim në dritën e këtyre rezultateve paraprake.
