Një incident i rëndë është regjistruar paraditen e sotme në një qendër votimi në Njësinë Administrative Maqellarë, Dibër, ku një konflikt verbal mes përfaqësuesve të Partisë Socialiste ka degjeneruar në dhunë fizike.
Sipas burimeve në vendngjarje, kandidati i PS-së, Danjel Gjura, ka goditur me grusht punonjësin e Ujësjellësit, shtetasin F.L., gjatë një debati që dyshohet se lidhej me aktivitetet zgjedhore dhe ndikimin mbi votuesit.
Ngjarja ka ndodhur brenda ambienteve të një qendre votimi dhe është vëzhguar nga qytetarë dhe komisionerë të pranishëm. Ende nuk ka një qëndrim zyrtar nga Partia Socialiste për incidentin, ndërsa policia është thirrur në vendngjarje për të marrë deklaratat dhe për të nisur procedurat hetimore.
Burime jozyrtare bëjnë me dije se konflikti ka nisur për shkak të mosmarrëveshjeve të brendshme në strukturat lokale të PS-së, dhe dyshohet se janë të lidhura me kontrollin mbi votuesit dhe listat e mbështetësve.
Ky incident vjen në një moment të tensionuar elektoral në Dibër, ku rivaliteti politik është i lartë dhe akuzat për presion mbi votuesit janë shtuar ditët e fundit.
