Një incident me ngarkesë të rëndë politike ka ndodhur pasditen e sotme në zonën e Maqellarës, Dibër, vetëm pak orë para përfundimit të fushatës zgjedhore. Deputeti i opozitës Xhemal Gjunkshi ka ndaluar një automjet të dyshuar, i cili – sipas informacioneve paraprake – dyshohet se po transportonte materiale zgjedhore dhe para për blerje votash në favor të Partisë Socialiste.
Burime për portalin Timoni.al bëjnë të ditur se ngjarja ka ndodhur në rrethrrotullimin e Maqellarës, ku automjeti në fjalë është ndalur nga deputeti Gjunkshi dhe përfaqësues të opozitës, të cilët kanë kërkuar verifikimin e menjëhershëm të përmbajtjes së mjetit. Sipas burimeve në terren, dyshohet se në makinë ndodheshin zarfe me para dhe lista emrash, që mund të përdoreshin për manipulim elektoral në zonën e njohur për garë të fortë mes mazhorancës dhe opozitës.
Deputeti Gjunkshi ka kërkuar ndërhyrjen e menjëhershme të forcave të rendit, duke deklaruar se “nuk do të lejojmë që vota e qytetarëve të vidhet me lekët e korrupsionit dhe të bandave”.
Në vendngjarje është paraqitur policia e Dibrës, e cila ka nisur verifikimet. Deri në këto momente nuk ka një deklaratë zyrtare nga Policia e Shtetit apo nga Partia Socialiste në lidhje me identitetin e personave në makinë apo për përmbajtjen e saj.
Ky incident vjen në një klimë të tensionuar politike, teksa opozita ka paralajmëruar se ka prova të qarta për përpjekje sistematike të blerjes së votës nga struktura të lidhura me qeverinë në disa bashki kyçe, përfshirë Dibrën.
Ngjarja e Maqellarës pritet të ndezë më tej polemikat për integritetin e procesit zgjedhor më 11 maj.
