FIER- Policia e Fierit ka reaguar pas arrestimit të kandidatit demokrat për deputet Fation Semanjaku në komisariat. Me anë të një njoftimi, Policia bën me dije se Semanjaku ka vendosur një poster të tijin në kundërshtim me ligjin në qendër të qytetit. Pasi policia bashkiake ka tentuar që të heq posterin, ka pasur kundërshtim nga ana e kandidatit.
Njoftimi i Policisë:
Reagim i Drejtorisë Vendore të Policisë Fier; Në lidhje me një lajm të publikuar për shoqërimin në Komisariat të shtetasit F. S. (Kandidat për deputet i subjektit politik Partia Demokratike), sqarojmë se: Rreth orës 18:50, Drejtori i Policisë Bashkiake ka njoftuar te Salla Operative e DVP Fier se një subjekt politik ka vendosur poster në qëndër të qytetit, në kundërshtim me ligjin dhe po kundërshton forcat e Policisë Bashkiake për heqjen e këtij posteri.
Pas njoftimit të marrë, në vendngjarje kanë shkuar shërbimet e Policisë të cilat për të parandaluar përshkallëzimin e konfliktit, kanë shoqëruar personin që po kundërshtonte policinë bashkiake, kanditatin për deputet të Partisë Demokratike, shtetasin F. S., i cili është lënë i lirë menjëherë. Drejtoria Vendore e Policisë Fier siguron subjektet politike dhe qytetarët se shërbimet e Policisë janë të angazhuara maksimalisht për të parandaluar e goditur paligjshmëritë si dhe për të garantuar rendin e sigurinë.
