TIRANA- Vetëm një javë na ndan nga dita e zgjedhjeve parlamentare dhe duket se Partia Socialiste vijon me ndryshimet e strategjisë së fushatës “gjatë rrugës”. Një kërkesë e re e kryesocialistit Edi Rama e mbërritur sot me anë të një mesazhi mund të ketë “turbulluar” ujërat e fushatës për kandidatët e PS-së.
Rama u ka kërkuar kandidatëve socialistë që të bëjnë video-selfie dhe t’i hedhin nëpër rrjete sociale, secili nga 7-8 postime të kësaj natyre, nën paralajmërimin se profilet e tyre do të minitorohen. Pjesë e kërkesës së Ramës është që në video-selfie të përfshihen kategori të ndryshme për të treguar, sipas tij, mbështetjen e të gjitha shtresave.
Mesazhi i shpërndarë për kadidatët e PS-së:
Duke qenë se kanë mbetur dhe pak ditë nga dita e zgjedhjeve, fushata në këtë pikë ku jemi, veç axhendës së secilit si dhe asaj të përbashkët, do të fokusohet në komunikimi direkt në rrjetet sociale.
Nga e diela (pra sot) deri të premten datë 9 maj, të gjithë kandidatët duhet të mbushin rrjetet e tyre sociale me VIDEO SELFIE me njerëz. Këto duhet të jene video të shkurtra të bërë në mënyrë spontane me këdo gjykoni të përshtatshëm gjatë ditës në terren. Mbani ne vëmendje të jenë kategori të ndryshme për të treguar mbështetjen e të gjitha shtresave.
Numri i videove selfie në ditë për secilin prej jush: 7-8. Sa më lart është porosi e Kryeministrit, ju lutem vëmendjen tuaj! Profilet do të monitorohen për të gjithë kandidatët’.
