Timoni.al ka siguruar në mënyrë ekskluzive një sondazh të brendshëm të realizuar nga strukturat e Partisë Socialiste, i cili flet qartë për një krizë të afërt në mazhorancën aktuale. Sipas të dhënave të këtij sondazhi, të përpiluar nga një grup ekspertësh të afërt me lidershipin socialist dhe të mbajtur deri më tani sekret, Partia Socialiste nuk arrin të fitojë shumicën e nevojshme për të qeverisur e vetme pas zgjedhjeve parlamentare të 11 majit 2025.
Sondazhi jep këtë ndarje mandatesh në nivel kombëtar:
• Partia Socialiste (PS) – 69mandate
• Partia Demokratike (PD) – 64 mandate
• Lëvizja Bashkë – 2 mandate
• Partia Socialdemokrate (PSD) e Tom Doshit – 2 mandate
• Shqipëria Bëhet – 1 mandat
• Partia Mundësia – 1 mandat
• Partia e Lulzim Bashës – 1 mandatKëto shifra konfirmojnë se asnjë forcë politike nuk do të ketë shumicë absolute në Kuvendin e ardhshëm. PS-ja, për herë të parë që prej vitit 2013, nuk do të jetë në gjendje të formojë një qeveri pa bërë aleanca të detyruara paszgjedhore. Burime të sigurta nga brenda selisë rozë thonë se ky sondazh është konsideruar “shqetësues” dhe ka rritur tensionin në nivelet e larta të drejtimit të partisë.
Mësohet se vetë kryeministri Edi Rama ka qenë i pranishëm në prezantimin e këtij sondazhi dhe nuk ka kundërshtuar përmbajtjen e tij. Madje, ai mësohet të ketë pranuar privatisht se “këto janë zgjedhjet më të vështira që kemi përballuar ndonjëherë” dhe se “duhet menduar seriozisht për pasojat e humbjes së shumicës”.
Për herë të parë pas më shumë se një dekade, Edi Rama mund të mos ketë më luksin të qeverisë pa bërë pazare politike. Me një PD të ringritur që del rritet në sondazh, dhe me rritjen e forcave të reja politike si Lëvizja Bashkë apo “Shqipëria Bëhet”, ndarja e pushtetit në Shqipëri duket më e fragmentuar se kurrë.
Kjo panoramë e re politike rrit ndjeshëm rëndësinë e partive të vogla, të cilat do të jenë kyçe në krijimin e shumicës parlamentare. Në veçanti, Partia Socialdemokrate e Tom Doshit, që del me 2 mandate, shihet si një potencial “kingmaker”, ashtu si edhe partitë e reja që përfaqësojnë qytetarë të zhgënjyer nga establishmenti politik.
Kjo situatë vë në pikëpyetje jo vetëm të ardhmen politike të Edi Ramës, por edhe stabilitetin e qeverisjes së ardhshme, e cila duket se do të jetë produkt i negociatave të vështira dhe i kompromiseve të shumta.
Ndërkohë, opozita duket se ka rifituar terren të ndjeshëm, me një Partinë Demokratike që jo vetëm arrin të rritet por edhe që ndodhet në pozicion të favorshëm për të negociuar koalicione me partitë e reja. Zgjedhjet e 11 majit, sipas shumë analistëve, pritet të jenë më të paparashikueshmet në historinë e tranzicionit shqiptar.
Timoni.al do të vijojë të sjellë për lexuesit e vet detaje dhe zhvillime të reja mbi këtë sondazh dhe dinamikën politike drejt zgjedhjeve të 11 majit.
