Kryetari i Partisë Demokratike, Sali Berisha, ishte pasdite në Fushë-Krujë, ku përveç prezantimit të kandidatëve të koalicionit opozitar, lëshoi akuzat e radhës ndaj qeverisjes dhe Kryeministrit Rama.
Berisha u shpreh se Rama udhëton dy herë më shumë se presidenti i SHBA-së, ndërkohë që bën fushatë si në vitet ’50, ku takon veçmas gratë dhe veçmas burrat.
Pjesë nga fjala e Berishës:
Rama nuk jep llogari për 130 milionë euro për djegësin e Tiranës që nuk ka as nam dhe as nishan. Rama fluturon me avion dy herë më shumë se presidenti i SHBA. Deklaroi 3800 euro në llogari dhe jeton në saraje, qindra metra katrorë, më shumë se edhe diktatori.
Ai bën fushatë veçmas me gratë dhe veçmas me burrat, ashtu siç bënin komunistët në vitet ’50.
Programi ynë ka dy qëllime madhore: T’u kthejmë paratë që janë vjedhur. Së dyti, t’u krijojë të gjitha mundësitë për të jetuar me dinjitet.
T’u fshijmë lotët pensionistëve shqiptarë, që jetojnë me një pension qesharak. Rama miratoi 8 miliardë euro buxhet, ndërsa për pensionistët planifikoi vetëm 16 milionë euro.
Ndaj dhe ne këtë program e nisim duke fshirë lotët e ftohta të mjerimit nga sytë e pensionistëve tanë që i kanë shkrirë jetën, mundin, djersën e tyre, mendjen dhe sot paguhen me një pension qesharak dhe poshtërues.
Edi Rama në janar të këtij viti paraqiti buxhetin 8 miliardë euro dhe në pashpirtësi të plotë, me përçmim të turpshëm ndau për 760 mijë pensionistë gjithsej 16 mln euro.
Pensioniste dhe pensionistë shqiptarë, fjala ime është 100 ditët e para në Shqipëri nuk do të ketë pension ndën 200 euro.
Dhe pensionet tjera do rriten me 20%.
Miq, sot 57% e pensionistëve marrin më pak se 172 euro. Të gjithë në fshat, qytet kudo që janë, të plotë të pjesshëm, pensioni nën 200 euro, do jetë 200 euro.
Çdo pensioniste, çdo rrogë ultë dhe nuk do të ketë rroga të ulëta asnjëherë ndën 500 euro.
Çdo rrogë ulët do të ketë kartën e konsumatorit, me të cilën bukën, gjërat bazë ushqimore do ti blejë 20% më lirë se të tjerët. Do mirrni pra 450 euro kthim të TVSH-së që keni shpenzuar.
Qeveria shqiptare ka vendosur 100 ditët e para të firmosë listën e rimbursimit të barnave që rimburson qeveria italiane.
Nuk do të ketë më nevojë të kërkoni ilaçe tek njerëzit tuaj, jo dhe jo. Ilaçet do ti merrni falas me listë, sipas listës që i marrin italianët sot.
Energjia zbret në 7 lek.
Tarifat ujit do të përgjysmohen.
Hiqen një seri taksash absurde, antikushtetuese, që këta grabitçarë kanë vendosur mbi ju.
Miq, unë jam këtu për tu dhënë fjalën se falen 100%, gjoba dhe kamat vonesat e IKMT-së për familjet.
Falen dhe kthehen mbrapsht të gjitha detyrimet dhe taksat e profesioneve të lira.
Falen taksat dhe tarifat vendore për bizneset e vogla dhe për individët, që në një verifikim të thjeshtë nuk kanë mundësi pagese, ose që kanë të ardhura sa minimumi jetik, apo llogari të bllokuara për shkak të taksave dhe tatimeve.
Falen kamatëvonesat dhe detyrimet tek të gjithë debitorët që janë nga tatimi mbi të ardhurat, në Shqipëri.
Falet taksa e pronës për familjarët që nuk kanë pasur mundësi ta paguajnë.
Falet taksa e pronës për bizneset pronën e tyre dhe jo me qira.
Falen të gjitha gjobat dhe kamatëvonesat e KESH-it dhe ujit.
Falen të gjitha gjobat e policëve bashkiak rryshfetxhinj dhe gjobëvënës mbi ju, asnjë mos paguani.
Pjesëtohet me 3, taksa e pastrimit për qytetarët dhe bizneset.
Hiqet taksa e reklamës për bizneset e vogla, hiqet tarifa e tabelës për këto biznese dhe të mëdhatë nga zero gjer në 4 metër.
Ndryshon taksa e pronës për bizneset e vogla që ushtrojnë aktivitetin në pronën e tyre, 5 vitet e para të biznesit.
Thjeshtohen në maksimum lejet e ndërtimit për banesat individuale në zonat urbane dhe rurale.
Hiqet taksa e ndikimit në infrastrukturë për banesat individuale, familjare, banesë e parë.
Rishikim i taksës së pronës familjare në apartamentet.
Hiqet taksa mbi pronën e emigrantëve shqiptarë, në mënyrë që ti ftojmë të vijnë, ta dinë që ne i presim ata dhe nuk i gjobisim.
Ju bëj thirrje biznesit të vogël, të mesëm, të madh, asnjë taksë të vendosur nga 1 janari gjer sot, nga agjentët e tatimeve etj., mos paguani sepse ka qenë vetëm taksë elektorale.
Nuk do njihet asnjëherë.
