Drejtoria Vendore e Policisë Fier ka njoftuar për disa ngjarje të ndodhura gjatë mbrëmjes së djeshme dhe mëngjesit të sotëm, ku janë kryer arrestime dhe procedime penale për shkelje të ndryshme ligjore.
Një 57-vjeçar, A. H., u arrestua në flagrancë pasi me motomjetin e tij përplasi një këmbësor 77-vjeçar në aksin Lushnjë-Fier, i cili humbi jetën në spital. Po ashtu, u arrestua edhe 43-vjeçari Xh. P., nga Divjaka, pasi u kap duke drejtuar motomjetin në gjendje të dehur.
Ndërkohë, janë proceduar penalisht shtetasi B. G., 47 vjeç, për kanosje ndaj një të moshuari, dhe R. H., 45 vjeç, për dhunë në familje ndaj bashkëshortes. Materialet për të gjitha rastet janë referuar Prokurorisë së Fierit për veprime të mëtejshme.
Drejtoria Vendore e Policisë Fier
Në lidhje me aksidentin rrugor të mbrëmshëm, në aksin rrugor “Lushnjë-Fier”, informojmë se në vijim të veprimeve procedurale, specialistët e Sektorit të Qarkullimit Rrugor bënë arrestimin në flagrancë të shtetasit A. H., 57 vjeç, banues në fshatin Pirrë, pasi me motomjetin që drejtonte, ka përplasur këmbësorin, shtetasin H. M., 77 vjeç, banues në fshatin Rrapëz, i cili si pasojë ka humbur jetën në spital.
Specialistët e Sektorit të Qarkullimit Rrugor arrestuan në flagrancë shtetasin Xh. P., 43 vjeç, banues në Divjakë, pasi u kap duke drejtuar motomjetin, në gjendje të dehur.
Specialistët e Komisariatit të Policisë Lushnjë referuan materialet në Prokurori, ku nisi procedimi penal për shtetasit:
-B. G., 47 vjeç, banues në fshatin Ardenicë, pasi dyshohet se për motive të dobëta, ka kanosur një shtetas 76 vjeç;
-R. H., 45 vjeç, banues në Lushnjë, pasi dyshohet se ka ushtruar dhunë ndaj bashkëshortes së tij.
Materialet procedurale iu referuan Prokurorisë së Fierit, për veprime të mëtejshme.
