Edhe kryepolici i Rrugores bashkë me drejtuesin e strukturës së hetimit të aksidenteve janë lënë në arrest me burg ditën e djeshme.
Ata kanë refuzuar të pranojnë akuzat dhe faktet që kanë dalë nga Prokuroria e Posaçme, por nuk kanë mundur të bindin gjyqtarin e masave për t’iu lehtësuar arrestin. Roven Zeka dhe Sokol Navaku janë lënë në burg pa afat, deri në përfundim të hetimeve edhe pse ata mund ta apelojnë vendimin e dhënë ditën e djeshme nga Shkalla e Parë e GJKKO-së.
Ndaj tyre është ngritur një akuzë për korrupsion dhe që ka lidhje, në fakt, me një ngjarje të rëndë, ku janë mbuluar pasojat e një aksidenti ku nga përplasja e dy automjeteve, pesë persona kanë përfunduar në spital, ngjarje e shënuar vetëm një javë më parë. Referuar të dhënave të bëra publike nga Prokuroria e Posaçme në lidhje me operacionin e kryer nga oficerët e Byrosë Kombëtare të Hetimit u mësua se tre zyrtarët e Policisë Rrugore të Tiranës dyshohet se morën ryshfet për të mbyllur çështjen në rrugë, ndërkohë që asnjë institucion nuk bën me dije se çfarë ka ndodhur me 5 qytetarët e plagosur në atë përplasje mes dy automjetesh me datë 16 prill.
Ditën e djeshme Gjykata e Posaçme ka caktuar masën ‘arrest me burg’ për dy shefat e policisë Rrugore të Tiranës, Roven Zeka dhe Sokol Novaku. Të dy oficerët e lartë akuzohen nga SPAK për veprën penale të korrupsionit, ndërsa burime bëjnë me dije se ata kanë mohuar akuzat dhe gjetjet e prokurorisë të bëra prezentë në këtë fazë të hetimit. Mësohet se Roven Zeka është shprehur para GJKKO se ai është një oficer karriere në radhët e Policisë së Shtetit, ndërsa oficerit Sokol Novaku nuk i janë pranuar argumentet për një masë më të butë sigurie për shkak të rrethanave familjare. Dy shefat e Rrugores kanë deklaruar se ata kanë zbatuar procedurën standarde duke referuar materialet në prokurori për drejtuesen e aksidentit. Ata kanë mohuar dijeninë apo përfshirjen e tyre në veprimet dhe mos veprimet e oficerit Edison Tabaku.
Në urdhrin e ndalimit të lëshuar nga prokurorja Elida Kaçkini evidentohej se të 3 punonjësit e policisë janë transferuar në Tiranë nga strukturat e Drejtorisë Vendore të Policisë Elbasan ku kanë shërbyer më parë. Prokuroria e SPAK, Elida Kaçkini kërkoi masën “Arrest me burg” për të dy dhe e njëjta masë u konfirmua nga gjyqtarja Flojera Davidhi. Një ditë më parë është dhënë masa e sigurisë “Arrest me burg” edhe për efektivin e Policisë Rrugore, Edison Tabaku. Të tre efektivët akuzohen se kanë kërkuar dhe marrë pagesën 2 mijë euro nga biznesmeni E. V., për të mos i arrestuar bashkëshorten që kishte shkaktuar një aksident më 16 prill. Arrestimet u bënë më 19 prill, menjëherë pas zbulimit të rastit, teksa Prokuroria ka zbardhur nëpërmjet përgjimeve edhe bisedat dhe aferën korruptive.
Sipas dosjes hetimore bëhet me dije se Tabaku e njihte bashkëshortin e gruas që shkaktoi aksidentin. SPAK pretendon se ka fakti që Tabaku është takuar dy herë me E. V., me qëllim marrjen e një shumë parash për t’i ndarë me dy eprorët. SPAK saktësoi se ka fakte e përgjime që mundësojnë komunikime me shuma konkrete në lidhje me mbylljen e çështjes së aksidentit të shkaktuar nga shtetasja A. V., ku u tha se u plagosën 5 persona.
