Në Gjykatën e Posaçme kundër Korrupsionit dhe Krimit të Organizuar po zhvillohet seanca e radhës për dosjen e “tragjedisë së Gërdecit”, ku i pandehur është ish-ministri i Mbrojtjes, Fatmir Mediu.
Ai ka kundërshtuar analizën e ekspertëve të akt-ekspertimit tekniko-ushtarak, duke hedhur poshtë çdo përgjegjësi direkte të Ministrisë së Mbrojtjes për tragjedinë.
Gjatë seancës, Mediu theksoi se trajtimi i municioneve ishte një kompetencë ekskluzive e Forcave të Armatosura dhe jo e ministrit. “Për çdo vendim të qeverisë ka pasur një urdhër ministri dhe pas çdo urdhri të ministrit një urdhër tjetër ose udhëzim të shefit të Shtabit të Përgjithshëm të FA, kështu funksionon në Ministrinë e Mbrojtjes,” u shpreh ai.
Mediu sqaroi gjithashtu se kompania SAC nuk kishte vetëm përgjegjësi për demontimin, por edhe për demilitarizimin e municioneve – kthimin e tyre në të paefektshëm dhe të parrezikshëm.
Sipas tij, ky aspekt nuk ishte përmbushur nga kompania dhe kjo i ishte vënë në dukje nga autoritetet.
“FA e ka pasur detyrë mbikëqyrjen. Zyrtarë të lartë të FA, sipas dëshmive, e kanë vizituar Gërdecin. Ata nuk kanë zbatuar detyrimet që ka urdhëruar VKM-ja,” deklaroi ish-ministri, duke nënvizuar se mungesa e përmbushjes së detyrimeve nga FA ishte thelbësore në këtë proces.
Seanca pritet të vijojë me shqyrtimin e mëtejshëm të provave dhe dëshmive, ndërsa mbrojtja e Mediut ka paralajmëruar se do të kërkojë ekspertizë të re për të hedhur dritë mbi përgjegjësitë konkrete të institucioneve të përfshira.
