Futbolli po përjeton një transformim të qetë, por vendimtar. Përtej fushës së lojës, klubet më të mëdha po përqafojnë teknologjinë dhe inteligjencën artificiale për të optimizuar vendimmarrjen sportive dhe për të parashikuar lëvizjet në merkato. Një nga mjetet më të avancuara në këtë fushë është PLAIER, një sistem që operon me një databazë prej mbi 300 mijë lojtarësh nga më shumë se 200 vende, duke ofruar analiza të personalizuara në bazë të stilit të lojës së çdo skuadre.
Pas eliminimit të Real Madridit nga Arsenal në çerekfinalet e Champions League, kur diskutimet për ndryshime në skuadër janë intensifikuar, PLAIER ka përgatitur për gazetën MARCA një raport ekskluziv, duke identifikuar lojtarët më kompatibël me sistemin e lojës së “Los Blancos” në pesë pozicione kyçe: mbrojtës anësorë, mesfushë organizuese dhe krahë sulmues.
Mbrojtës ofensivë me profil modern
Në krahun e djathtë, AI sugjeron Reece James (Chelsea), Trent Alexander-Arnold (Liverpool) dhe Josip Stanisic (Bayern). Të gjithë shquhen për kontributin ofensiv dhe aftësinë për të gjeneruar lojë nga krahët – elementë jetikë për një skuadër që kërkon gjerësi dhe saktësi.
Në krahun e majtë, përzgjidhen Oleksandr Zinchenko (Arsenal), Maximilian Mittelstadt (Stuttgart), një prej më të spikaturve në Bundesliga këtë sezon, dhe Lewis Hall (Newcastle), një talent i ri anglez me potencial të madh.
Një “tru” i ri pas tërheqjes së Kroos
Pas pensionimit të Toni Kroos, Real Madrid ka nevojë për një organizator të ri në mesfushë. PLAIER përzgjedh si më të përshtatshmit Bruno Fernandes (Manchester United), James Maddison (Tottenham) dhe Joey Veerman (PSV), të gjithë me kreativitet dhe aftësi për pasimin final.
Zëvendësuesi i mundshëm i Vinicius dhe krahu i djathtë
Nëse ndonjëherë do të duhej të zëvendësohej Vinicius Junior, që sipas Radio MARCA ka pasur kontakte me klubet e Arabisë Saudite, sistemi sugjeron:
• Jeremy Doku (Manchester City), për shpërthimet e tij vertikale,
• Luis Sinisterra (Bournemouth), me përvojë në Premier League,
• Alejandro Garnacho (Manchester United), për fuqi dhe driblim.
Në krahun e djathtë, inteligjenca artificiale propozon:
• Noni Madueke (Chelsea), driblues i pastër,
• Estevao (Palmeiras), një diamant brazilian që do t’i bashkohet së shpejti Chelsea-t,
• Bukayo Saka (Arsenal), një nga më të kompletuarit në Europë.
E ardhmja është këtu
Megjithëse teknologjia nuk zëvendëson syrin e skautit, ajo ndihmon në përshpejtimin e proceseve dhe në minimizimin e gabimeve. Në një klub si Real Madrid, ku çdo lëvizje në merkato peshohet në detaj, inteligjenca artificiale mund të bëjë diferencën.
Emrat e propozuar nga PLAIER janë sinjal i qartë se futbolli po lëviz drejt një epoke të re, ku algoritmet nuk zëvendësojnë pasionin… por ndihmojnë për ta menaxhuar më mirë.
