Përgjimet e Erion Veliajt në burgun e Durrësit kanë nxjerrë mjaft të dhëna të rëndësishme dhe jo vetëm faktin se ai urdhëronte mediat, ato që paguan me vëllanë e tij apo që kanë përfitime të tjera pushteti për shkak të tij. Më e rëndësishmja, janë disa vepra penale të kryera.
Së pari, arsyeja pse Erion Veliaj është në burg, që ka të bëjë me marrjen e provave, prishjen e tyre etj.
Sipas përgjimeve, mjafton të shikojmë faqen 73, ku në datën 26 shkurt Erion Veliaj bisedon me Ajolën në lidhje me dëshmitaren Greta.
Erioni i kërkon Ajolës të lidhet me Gretën, ta inkurajojë dhe më pas flet për fjalën që ka mbajtur kryeministri në mbledhjen e grupit parlamentar të PS, ku sipas Veliajt e ka mbrojtur Klotildën dhe i ka bërë thirrje të flasë me vete.
Më tej Erion Veliaj flet edhe për qëndrimet që do të mbajnë dy persona të tjerë, siç janë Erald Simixhiu dhe nëna e Ajolës, Valbona. Ky përgjim është i datës 18 shkurt 2025, në orën 20:51. Ajola bisedon me Erionin, i tregon për shqetësimin se duhet të paraqiten në prokurori nëna e saj dhe daja Erald Simixhiu.
Veliaj i tregon se po u bënë dy tre pyetje, ata duhet të thonë “do pyes avokatin dhe do t’iu them”, “erdha vetëm për t’iu përgjiur thirrjes, por nuk do të dëshmoj kundër vajzës, s’kam detyrim ligjor, kaq asgjë më shumë” dhe të shkojnë aty dhe të thonë jo nuk do dëshmoj kundër vajzës sime, as t’i thonë u qëndroj deklarimeve, s’kam ça i qëndron fare, as nuk flet fare, nuk dua të dëshmoj, nuk dua të dëshmoj, po shkatërroni familje të tërë, s’dua të dëshmoj. Më pas Erioni tregon se ka biseduar me Maksin dhe të premten do të mblidhen të gjithë Dhoma e Avokatisë.
Ngjarje që të gjitha ndodhën më pas. Pra janë të paktën tre raste, Greta Domi, daja Erald Simixhiu dhe Valbona Xoxa, sipas të dhënave dhe akteve të gjykatës, kjo e dyta në faqe 69, të cilat tregojnë se Erion Veliaj nga qelitë e burgut të Durrësit ndikonte te dëshmitarët që ata të ndryshonin thëniet e tyre përpara prokurorëve.
Kjo është një nga arsyet shtesë të forta që kanë pasur prokurorët përballë gjykatës, pas provave të siguruara se kryetarja e Komisionit të Ligjeve, Klotilda Bushka ishte angazhuar së bashku me Ajola Xoxën në prishjen e provave. Rasti flagrant është kapur nga prokurorët e SPAK, ai i kontaktit në të paktën dy raste i Klotilda Bushkës, i pari në zyrën e Avokatit të Popullit dhe i dyti në një ambient tjetër kur një nga dëshmitarëve i merret telefoni, i kërkohet të ndryshojë thënie e kështu me radhë.
Pra janë katër raste në total, në të cilat një i zhvilluar jashtë dhe tre gjatë kohës që Erion Veliaj është në burg, që kryebashkiaku i Tiranës dhe njerëzit rreth tij, kanë tentuar dhe deri diku ia kanë arritur dhe qëllimit, që dëshmitarët të ndryshojnë thëniet e tyre para prokurorëve dhe marrja e provave të mos jetë më e lehtë për hetuesit, të cilët janë duke zhvilluar hetimet intensive për kryebashkiakun e Tiranës, ndaj të cilit tashmë Apeli i GJKKO ka dhënë masën e arrestit burg pa afat./ Marre nga CNA.al
