TIRANË- Gazetarja Klodiana Lala ka folur mbrëmjen e sotme lidhur me rrjedhjen e materialeve hetimore të dosjeve të SPAK.
Lala tha në emisionin “Opinion” se ka dyshime se pas dy personave të arrestuar deri më tani për çështjen qëndron një ish-zyrtar i lartë që ka mbajtur disa poste dhe në administratë.
Më tej, gazetarja tha se eksponentë të lartë të Partisë Socialiste rezultojnë të lidhur me personat e arrestuar mbi marrjen e dosjeve të SPAK.
“Pas dy të arrestuarve dyshohet se qëndron një ish-zyrtar i lartë që ka mbajtur disa poste dhe në administratë. I është kontrolluar banesa. Këto materiale mund të përdoren edhe për shantazh dhe për të prishur reputacionin e SPAK. Eksponentë të lartë të PS rezultojnë të lidhur me personat e arrestuar.”, tha gazetarja.
Sipas saj Prokuroria e Posaçme duhet të dalë me disa sqarime lidhur me çështjen dhe t’ju japë përgjigje disa pyetjeve. Ajo tha se hetimet mbi ngjarjen ende vazhdojnë.
“SPAK duhet të sqarojë publikun si janë marrë këto dosje? Në duart e kujt kanë përfunduar? A është ndryshuar gjë në këto dosje? Është një qendër e sofistikuar që merret me përgjime të paligjshme. Ende nuk dihet janë hakime apo përgjime sepse hetimet vijojnë.”, tha Lala.
