SHBA-Një gjykatë federale në Nju Jork urdhëroi administratën e presidentit të SHBA, Donald Trump, që të ndalonte përkohësisht përpjekjet e saj për të mbyllur Zërin e Amerikës, duke ndaluar qeverinë të pushonte nga puna 1,300 gazetarë dhe punonjës të tjerë të shërbimit informativ amerikan, të cilët ishin pezulluar papritur në fillim të këtij muaji.
Reuters raporton se gjykatësi i Distriktit të SHBA, J. Paul Oetken, në një vendim të dhënë të premten, deklaroi se administrata e Trump nuk mund të mbyllte në mënyrë të njëanshme Zërin e Amerikës dhe programet e tjera radiofonike të miratuara dhe të financuara nga Kongresi.
Gjykatësi nuk urdhëroi që Zëri i Amerikës të rifillonte transmetimet, por vendimi i tij e bëri të qartë se punonjësit nuk duhet të pushohen nga puna deri në përfundimin e procedimeve të mëtejshme gjyqësore, të cilat do të përcaktojnë nëse mbyllja ishte “arbitrare dhe kapriçoze” në shkelje të ligjit federal.
Gazetarët e Zërit të Amerikës dhe sindikatat e tyre paditën Agjencinë Amerikane për Median Globale, drejtorin e saj të përkohshëm Victor Morales dhe këshilltaren speciale Kari Lake javën e kaluar, duke pretenduar se mbyllja e institucionit shkelte të drejtën e tyre kushtetuese të Amendamentit të Parë për lirinë e fjalës.
Padia e punonjësve të Zërit të Amerikës është një nga katër sfidat ligjore të hapura kundër përpjekjeve të administratës Trump për të mbyllur programet mediatike të financuara nga qeveria. Padi të tjera janë ngritur nga Radio Evropa e Lirë, një grup tjetër punonjësish të Zërit të Amerikës dhe fondi për financimin e teknologjisë së hapur Open Technology Fund.
