VELIPOJË – Banorët e fshatit Baks-Rrjoll në Velipojë, kanë dalë në protestë paraditen e kësaj të mërkure për të kundërshtuar ndërtimin e një resorti në këtë zonë.
Kjo ishte hera e dytë që banorët dilnin në protestë, ndërkohë që ditën e sotme ka pasur edhe përplasje me policinë. Siç mund të shihet edhe në videon e mëposhtme forcat e policisë kanë tentuar të largojnë me dhunë banorët e zonës të cilët në shenjë revolte kishin bllokuar punimet.
“Largohu, ec, largohu”, dëgjohet të thotë një polic me tone të larta, teksa me një shkop gome në dorë largon banorin nga zona e ndërtimit.
Banorët kanë tentuar të rezistojnë kundrejt policisë, ndërsa siç dëgjohet dhe në video ata u kërkojnë efektivëve që të mos i prekin me dorë. “Mos na prekni me dorë, mos na prekni”,- dëgjohet të thotë një banor.
Qytetarët kanë shprehur revoltën e tyre me rezistencë, ndërkohë që bëhet me dije se policia ka shoqëruar në komisariat disa prej tyre. Vetë banorët në një prononcim për mediat më herët kanë deklaruar se i kanë pronat prej shekujsh dhe pretendojnë se me dokumente të falsifikuara është tjetërsuar prona.
