LONDËR- Pankarta dhe banderola me mesazhe të ndryshme janë shfaqur mbrëmjen e sotme nga tifozët shqiptarët në stadiumin e “Wembleyt” në duelin mes Shqipërisë dhe Anglisë.
Një nga më të goditurat në mesazhe ishte dhe banderola me foton e Ardit Gjoklajt ku shkruhej “Ardit, ata menduan se nuk ka ZOT! Ne nuk të harrojmë”. Shqiptarët nuk e kanë harruar ngjarjen e rëndë, ku para 9 vitesh, Arditi humbi jetën në landfillin e Sharrës.
banderola
Teksa po punonte aty, nën moshë dhe pa asnjë siguri për jetën, bashkë të vëllain, ai humbi jetën nga përplasja me fadromën. Shoqëria civile dhe opozita bëjnë fajtor për këtë ngjarje të rëndë edhe kryetarin e Bashkisë Tiranë, Erion Veliaj, pasi ishte Veliaj që inaguroi disa muaj para se të ndodhte ngjarja këtë landfill dhe garantoi se puna do të kryhej sipas të gjitha standarteve.
Më 17 tetor të 2016 ekspertiza mjekoligjore, e administruar tashmë si provë në dosje, konfirmoi vdekjen e të riut, pas goditjes nga fadroma, e cila ishte duke punuar me pirgun e mbeturinave, më 7 gusht 2016.
Ndërkohë kryebashkiaku i Tiranës aktualisht ndodhet në burg, jo për këtë ngjarje, por si i dyshuar për kryerjen e veprës penale të “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminale”.
