Atletico Madrid-Barcelona ishte supersfida e javës së 28-të në La Liga, e luajtur në “Metropolitano” dhe ashtu siç pritej, dhuroi vërtet spektakël. Rezultati do të zhbllokohej në fund të pjesës së parë.
Pas një kundërsulmi të shpejtë, ishte Julian Alvarez që dërgoi topin në portën e mbrojtur nga Szczesny. Ishte Griezmann në krah që pasoi për Guliano Simeone, ky i fundit asiston për Alvarez dhe argjentinasi dërgoi topin në rrjetë.
Në minutën e 69-të, Atletico shënon golin e dytë me Sorloth, pas super asistit të Gallagher. Katalanasit nuk u dorëzuan dhe reaguan në mënyrën e duhur shumë shpejt.
Pas një depërtimi të bukur në zonë, Ingo Martinez asiston për Lewandowski-n, polaku iu shkëputet mbrojtësve vendas dhe dërgon topin në rrjetë.
Në minutën e 77-të, Raphinha kroson në zonë, Ferran Torres mposht me kokë Oblak dhe barazon shifrat 2-2. Në minutën e 92-të, Lamine Yamal shënon golin e tretë me një goditje spektakolare në kufijtë e zonës së rreptësisë, i ndihmuar edhe nga devijimi i kundërshtarit. Në minutën e fundit shtesë, Barcelona shënoi edhe golin e katërt me Ferran Torres, duke kompletuar kështu një përmbysje të çmendur.
Rezultati përfundimtar, Atletico-Barcelona 2-4. Një fitore e çmendur për katalanasit, të cilët tani kryesojnë me pikë të njëjta me Real Madrid-in, por katalanasit kanë një ndeshje të prapambetur. Atletico mbetet 4 pikë larg dy kryesuesve.
